Galliani leh Berlusconi ten Milan an siamṭha thei ang - Kaka

FIFA World Player of the Year chawimawina pawh lo dawng tawh Kaka chuan president Silvio Berlusconi leh vice president Adriano Galliani te chuan AC Milan chuan tun hmaa a lo ropui tawhna ang kha an neih let pui leh theih a rin thu a sawi.

Orlando City forward Kaka hi kum 2003-09 inkhar khan Italian Club tan hian a lo khel tawh a, league title leh Champions League nomawi a chawi pui nghe nghe.

Italian champion vawi 18 lai lo ni tawh Milan hi Kaka-a'n a chhuahsan hnuah league-ah vawi khat chiah an la champion leh a, tun season-ah phei chuan champion chu sawi loh a sang pali zinga tel pawh huphurhawm tak a ni.

Kum 33-a upa Kaka chuan, "Ka theih phawt chuan Milan inkhel hi ka la en ṭhin. Tunah hian an dinhmun hi a duhawm hran lo a, hmalam an pan lo tih pawh phat rual a ni lo. He an harsatna laka hruai chhuak tur hian hruaitu ṭha an mamawh. Galliani leh Berlusconi te hian tun hmaa team ṭha an neih ang kha an din leh theih ngei ka beisei," a ti.

Manager Sinisa Mihajlovic enkawlna hnuaiah Milan hi Serie A match 20 khelh zawh tawh aṭanga point 32 hmuin table-ah parukna dinhmun an luah mek.