French Cup PSG tan Ibrahimovic a inlar leh

Paris Saint-Germain chuan French Cup (Coupe de France) last 16 thleng turin Toulouse chu 2-1 in an hneh. Thawhlehni zan inkelah Zlatan Ibrahimovic chuan hun tawp dawnah chakna goal a khung a ni.

PSG khelmual Parc des Princes-a inkhelah beisei loh takin mikhual Toulouse tan defender Francois Moubandje chuan minute 11-na lekah goal hmahruai a khung.

Laurent Blanc-a nau ten an si phurh sut tum mah se hun chanve hma lamah goal an nei thei lo. Second half minute 54-naah PSG tan defender David Luiz chuan an si phurh a sut a, team pahnihte hi 1-1 in an inhnehtawk mai dawnin a lang hman.

Mahse, hun tawp hma mi-nute hnih chauh a awm tawh tihah Swedish striker Inrahi-movic chuan chakna goal a khung. PSG leh Toulouse te hi kar tawp Ligue 1 match-ah khan an lo inhmachhawn tawh bawk a, hemi ṭum pawh hian Zlatan hian goal awmchhun a lo khung tawh bawk.

Inkhelh bana thuthar theh-darhtu ten a contract chungchang an zawhna chhangin PSG mana-ger Blanc chuan, "February 16-a Chelsea nen Champions League last 16 kan khelh hma ngeiin contract thar kan tih fel hman ka ring. Ka agent leh club thuneituten an ti fel thuai ang," a ti.

Kum 50-a upa Blanc hian kum 2013 aṭang khan PSG hi a enkawl a, tun season Ligue 1 khelh mekah match 21 chhung chak loh nei loin an kaltluang tawh a, point 57 hmu tawhin anmahni hnaih bertu Monaco-in an phak lohna zat hi point 21 a tling tawh.