ADFA 1st div champion Chhinga Veng FC

Aizawl DFA hnuaia inelna sang ber Haier First Division final-ah, Chhinga Veng FC-in league-a hneh loh tawng lo Aizawl FC Academy chu 2-0 a hnehin an champion.

Thawhlehni zan Lammuala inkhelah hian Chhinga Veng tan Lalthlamuana'n goal hnih a khung a, league stage-a goal 44 zet khungtu Aizawl FC Academy-in goal an khung lo.

Mizoram Premier League Season 5 khelh tumin champion Chhinga Veng FC an inbuatsaih chhunzawm ang a, Aizawl FC Academy hi I League Under 18 final round khel turin an inpuahchah thung ang.

Final chu

First division league hmawr bawkna inkhelah Mamit tlang-val Thlatea'n minute 10 leh 50-naah goal a khung a, goal pahnih hi Chhinga Veng ṭantu-te tana lawmna thlentu a ni.

Goal hnih lut chauh hi final-a thil thleng a ni lo a, darkar chanve vel chauh an khel tihin Aizawl FC Academy playmaker Lalawmpuia leh Chhinga Veng defender Ronald Lalzikpuia-te khelmual chhungah an inkhak buai a, referee-in player pahnih hi a hnawt chhuak.

Champion rinkai zawk AFC Academy-in goal an phurh hma avangin an talbuai a, Armed Veng midfielder OP-a red card hmuin an buaina a belchhah bawk. Chhinga Veng hmatawng an khel ṭha a, goal hnih khungtu Thlatea hian hattrick siam theihna tur hun ṭha nei mah se keeper David Lalrinpuia'n a dansak ve ve.

Chhinga Veng FC tan New Chalrang forward C. Lalmuanpuia a hmuhnawm a, Vaivakawn tlangval Van-lalhriata chu midfield khaipa niin Mahriata hian crossbar a pet per nghe nghe.

AFC Academy lam pawhin goal khung theihna tur an nei ve tho a, best player-a thlan Rochhar-zela'n ṭum danga a khungna
ṭhin-ah best goalkeeper-a thlan Hma-ngaihramengmawia a pass.

Hei chauh hi a ni lo, AFC Academy hian Chhinga Veng tlarhnung an ṭhiah vek hnuah Johny VL Muanpuia a muang hret a, Chhinga Veng defender Rohlua'n an tihsual a siam ṭha hman. Rohlua hi inrawlh hma lo se chuan Johny-a bakah AFC player pathum Rochhara leh Lal-remsanga, VL Ṭhazuala te'n keeper chauh an hmachhawn tawh a, an hun ṭha neih an hlah hi AFC rawlthar-te hian an ui khawp ang.

League stage-a chiang taka hmahruaitu Aizawl FC Academy-in final-ah an ṭhatna an pho chhuak thei lo a, Chhinga Veng erawh veng chhung mipui puihna zarah ṭha takin league hmawr an bawk a, first division champion an ni.

Hmabak

January thla tawpah MPL5 qualifier khelh a ni dawn a, Aizawl DFA aiawhin champion Chhinga Veng leh pathumna Ramhlun North te an tel ang. Aizawl FC Academy erawh champion pawh ni se an senior team-in MPL an khelh tawh avangin Mizoram league sang berah an inlan thei lo.

MPL5 qualifier-ah hian Dis-trict FA tinin team pahnih
ṭheuh an thawh thei a, vawi khat inkhelh kuala point sang berin MPL an khel ang. Qualifier-a pahnihna hian MPL4-a pasarihna Luangmual FC nen MPL hmunruak pakhat dang inchuhin playoff an khel bawk ang.

Eng nge an sawi?

Aizawl FC coach Nicky Mal-sawmtluanga chuan, "Fi-nal-ah Chhinga Vengin ṭantu an ngah a, kan player-te naupanna a lang a ni. Kan khelh danah
ṭum dang kan pha lo a, kan pet goal-na ṭhinah kan khung lo. Kan playmaker OP-a red card hmu kan tuar a, kan vanduai tel bawk a ni. Chutihrualin tun hi kan vawi khat chak lohna a ni a, kan result hian I League U18 final round-ah chak duh tak takna min pek belhchhah ngei ang," tiin a sawi.

Chhinga Veng manager Lalthanzama Vanchhawng chuan, "Inkhelh hmaa ka sawi ang khan pressure nei loin kan khel a, kan chak phah niin ka hria. Kan coach H. Lalremruata game plan-a fuh a, veng chhung mipuiin min ṭawiawm ṭha bawk. K. Kawla Stand, tlang leh goal hnungah te kan veng mipui an ṭhu ṭhup a, anni zarah kut bengin kan haw lo a, nomawi hlu tak kan vengah kan chawi haw. Veng mipui leh min awmpuitu Pathian chungah lawmthu kan sawi a, min sponsor-tu Pran leh JSJ Fitpro-te hi tun dinhmun kan thlen theihna chhan a ni," tiin Vanglaini palai a hrilh.

Fair Play award : Ramhlun North

Best Player : Rochharzela, AFC Academy

Top Scorer : Vanlallawma, FC Kulikawn (12 Goals)

Best Striker : Lalbiaknia, Chawnpui FC

Best Midfielder : Lalhlimpuia, Chaltlang FC

Best Defender : Stephen Lalnunmawia, AFC Academy

Best Goalkeeper : Hmangaihramengmawia, Chhinga Veng FC

Inelna Thlirna Tawi

Final Results

AFC Academy 0 - 2 Chhinga Veng FC

CFC : Lalthlamuana 10', 50'

Team Dinhmun

Pos Team Lawmman

1 Chhinga Veng Rs 1,50,000

2 AFC Academy Rs 80,000

3 Ramhlun North Rs 65,000

4` Chawnpui FC Rs 55,000

5 Chaltlang FC Rs 45,000

6 FC Kulikawn Rs 35, 000

7 Electric Veng FC Rs 25,000

8 Upper Republic FC Rs 15,000