I league U15 final round-ah Aizawl FC

I League Under 15 qualifier-ah Aizawl FC-in nimin khan F. Lalrohlua goal hnih hmangin Gangtok Himalayan chu 2-0 in an hneh a, match khat khelh hmabak la awm chungin final round an lut.

Rest of India Zone I-ah Aizawl FC-in an match hmasa berah F. Lalrohlua leh Peter Lalduhawma te goal hmangin Neroca FC 2-0 in an hneh a, nimin tlai inkhel danga Neroca FC-in NRL SPT an hneh bawk avangin Aizawl FC umpha thei an awm tawh lo.

I League Under 15 quali-fier hi hmun hrang hrangah neih a ni a, Rest of India Zone I inelna hi Khuman Lampak Practice Ground, Imphal-ah neih a ni.

Aizawl FC hian January 22 hian an match hnuhnung berah point la hmu lo NRL SPT an hmachhawn dawn a, point thum hmuhna tura ngaih theih a ni.

Aizawl FC U15 coach Rohmingthanga chuan, "Kan player-te an la naupang deuh a, hmasawnna tur kan la ngah hle. Kan result-ah kan lungawi a, final round khelh turin inpuahchahna hun ṭha a awm dawn avangin nasa takin hma kan la sawn thei ang," tiin Vanglaini palai a hrilh.

Final round hi April, 2016 hian Tata Football Academy, Jamshedpur-a khelh tura ruahman a ni.