Dan theih loh Roger Federer

Khawvel mipa tennis player piang tawh zinga Grand Slam title la hnem ber Roger Federer chuan nimin khan Australian Open second round-ah Alexandr Dolgopolov chu straight set-in a hneh a, major tournament-ah match 299 hnehna a channa chiah a ni.

Grand Slam vawi 17 champion tawh Federer hian Rod Laver Arena-ah a khel ṭha takzet a, vawi 24 ace siamin a service vawi 49 aṭanga vawi 43 zet chu a hmasa zawkah dik nghalin Dolgopolov chu minute 92 chhungin 6-3, 7-5, 6-1 in a hneh. Federer hian first round-ah Nikoloz Basilashvili chu 6-2, 6-1, 6-2 in a lo hneh tawh bawk.

Kum 27-a upa Dolgopolov hian kum 2011 khan Australian Open quarterfinal a lo inhlangkai ve tawh a, hemi ṭum hian Jo-Wilfried Tsonga leh Robin Soderling te a hneh ve nghe nghe.

Swiss thiampuipa Federer chuan, "Dolgopolov khelh dan kha ṭha ka ti hle, a bik takin ka second serve a rawn vuak let dan kha ṭha ka ti ṭhin. Player tawh khirh tak a ni a, world number 35 ni mah se ka hmuh dan chuan ani aia rank sang tak tak aiin a thiam ka ti zawk," tiin a khingpui chu a fak hle.

Federer chuan sawi chhun-zawmin, "Vawiin chu ka khel ṭha thawkhat hle in ka hria, ka service a ṭhain ka che vel pawh nuam ka ti hle. Major tournament bikah vawi 300 hnehna chan tlin theih ngei ka inbeisei a, mahse chumi thleng tur chuan dawhthei taka ka nghah a ngai thung," a ti.

Kum 34-a upa Federer hian Australian Open title hi vawi li a lo chawi tawh a, Roy Emerson (6) leh Novak Djokovic (5) te chiah tluk loh a nei mek.

Nimin vek khan seeded parukna Tomas Berdych chuan minute 98 chhungin Mirza Basic chu 6-4, 6-0, 6-3 in a hneh a, seeded 12-na Marin Cilic leh khawtual tlangval Dominic Thiem te pawhin second round an paltlang ve bawk.

Bhupathi te chak nghal

India tennis star Mahesh Bhupathi leh a ṭanpui Gilles Muller ten Men's Double-a an match hmasa berah khawtual tlangval pahnih ṭangdun Alex Bolt leh Andrew Whittington te chu 7-6, 3-6, 6-4 in an hneh.

Hetih mek lai hian Indian tennis player dang Leander Paes leh Jeremy Charady te erawh an tlawm thung. Seeded 12-na Juan Sebastian Cabal leh Robert Farah te lakah 3-6, 4-6 in an chak lo a ni.