FA Cup Third Round Replay Liverpool an chak; Spurs-in Leicester an hneh

Nilaini zan khan FA Cup third round-ah inkhel pahnih a awm a, Premier League club lian Liverpool leh Tottenham Hotspurs-te'n an khingpui hnehin fourth round an lut.

Liverpool-in khualmuala 2-2 a an inhnehtawkpui Exeter City lakah zahngaihna an lantir lo a, an mikhual League Two club hi Anfield-ah 3-0 in an sawp. Reds hian fourth round-ah West Ham an mikhual ang. Inkhel dangah Spurs-in league lama season bul ṭan ṭha Leicester chu 2-0 a hnehin, FA Cup aṭangin an hnawt chhuak.

Reds an vul

Liverpool-in inkhelh ṭan aṭanga minute 10-na lekah goal an khung nghal a, Brad Smith leh Christian Benteke-te'n mawi taka ball an inpek kual hnuah Joe Allen chuan goal ruakah a khung. Reds tan English winger Sheyi Ojo leh Joao Teixeira te'n goal khat ve ve an khung ve leh a, Exeter-in an chhanglet thei lo.

Reds tan minute 65-naa tlan lut Sheyi Ojo a hmuhnawm a, kum 18 leka upa winger goal khung hi player class bik ke aṭanga chhuaka mawi a ni. Liverpool tan a dan pangngaiin Jordon Ibe a che ṭha a, kum 20-a upa winger hian Ojo pet goal tur a siamsak bakah crossbar a pet per bawk.

Merseyside club rawlthar rual zingah Cameron Bran-nagan leh Smith-te khelh danin mit a tlung a, Premier League-ah an hmel kan hmu thuai a nih pawhin a mak lo ang.

Sawisel hlawh Benteke

Liverpool manager Jurgen Klopp-a'n League Two club an hmachhawnna inkhelah player naupang zawk a chhawr a, Premier League-a tawnhriat ngah tawh player zingah Jose Enrique, Simon Mignolet, Chris-tian Benteke leh Joe Allen-te chiah a luhtir a, mipui ngaihven ber erawh Benteke a ni.

Nipui transfer laia pound maktaduai 32.5-a Reds zawmtu striker hian a man phu khawpin a la khel chhuak lo nia sawi a ni a, League Two club lakah pawh a danglam chuang lo. Aston Villa striker hlui hian Exeter lakah chance ṭha a neih vawi li vel a khawh ral a, Premier League club lian striker tur meuh chuan a thiamna hian a phak lo niin a lang.

Reds boss Klopp erawh an inkhelh leh turah a rilru a awm a, German manager chuan, "Fourth round-a kan hmachhawn tur hi West Ham an ni a, Hammers kan hmachhawn hian kan khelh ṭhat ngai loh avangin tun aṭanga kan rilru kan sen nghal a ngai a ni. FA Cup hi kan tan tournament pawimawh tak a ni a, Exeter lakah khan kan khel ṭha hle a ni," a ti.

Flanagan a lo kir

Liverpool Academy chhuak Jon Flanagan chu thla 18 zet hliam vanga a inkhelh theih loh hnuah a lo kir leh ta a, Anfield-a mipui 43,000 pungkhawm ten minute 51-naa khelmual chhung a luhin zahna lantir nan ding chungin an lo lawm.

Season hnih liamtaa Liver-pool-in Premier League nomawi an hnaih laia an player ṭangkai ber pawl Flanagan hian May 2014 hnuah Merseyside club tan a hmel a la lan leh lo a, vawi hnih lai a khup zai a ni tawh.

Spurs hmaah Foxes

Tun hnaiah Tottenham leh Leicester City-te vawi hnih an inhmachhawn a, Spurs-in chak hmel an hmu lo ve ve. FA Cup third round-a an inkhel hmasa zawkah team pahnih hi 2-2 in an inhnehtawk a, Premier League-ah Leicester-in 1-0 in hnehna an chang bawk.

Nilaini zan inkhelah erawh engkim a danglam a, Foxes khelmualah mikhual team Spurs-in 2-0 in hnehna an chang. Spurs tan Son Heung-min leh Nacer Chadli-te'n goal khat ve ve khungin Leicester-in an mikhual tan harsatna an siam meuh lo thung.

Spurs hian FA Cup fourth round-ah League One club Col-chester United an lenchilh ang.

Spurs fapa Son!

Tottenham-in an player langsar Harry Kane leh Dele Alli-te bench-ah an dah a, Lei-ces-ter-in Jamie Vardy, Riyad Mahrez leh Shinji Okazaki-te inkhel bul an ṭan tir lo bawk. Hetiang kara player langsar ber chu Spurs striker Son-a a ni.

Nipui laia Spurs-in pound maktaduai 22-a an lei Son hian Leicester tlarhnung mawi taka a ṭhiah hnuah Ben Chilwell a bum leh a, Spurs goal sirah mawi takin a pet lut. Goal a khung hnuin South Korean striker hian Kane-a ball pek a dawn hnuah mawi takin Yohan Benalouane a bum a, Chadli goal khung tur a siamsak bawk.

Eng nge an sawi?

Tottenham manager Mau-ricio Pochettino chuan, "Premier League leh Europa League kan khelh bawk avangin player inthlak kual reng a ngai ve a, kan tana pawimawh ber chu ka squad pumpui hman theiha an awm reng hi a ni. Season duhawm tak kan hmang mek a ni," tiin a naute khelh danah a lawm hle.

Leicester boss Claudio Ra-nieri chuan, "Tottenham khan chak an phu zawk a ni. Kan ngaih pawimawh hmasak ber chu Premier League a ni. Ka player-te'n theihtawp chhuahin an khel a, an khelh danah ka lawm em em a ni," tiin a naute khelh dan a sawisel duh lo.