Djokovic-a'n Halys a hneh

World number 1 Novak Djokovic-a'n a vanglai a hmang chho mek zel. Australian Open third round lut turin French rawlthar Quentin Halys chu darkar khat leh minute 40 chhungin 6-1, 6-2, 7-6 in a hneh.

Tun hnaiah kum 28-a upa Djokovic hian amah khing zotu a hmu meuh lo. Kumin kum tir khan Doha-ah champion-in ATP title 60 a la tling tawh a, a inkhelh hnuhnung 32 aṭangin vawi 31 hnehna a chang thei.

Australian Open-ah hian champion hnem ber chu Roy Stanley Emerson niin vawi ruk a champion tawh a, kuminah hian Djokovic a champion a nih chuan champion tam ber record hi a nih rual chiah ang.

Grand Slam vawi 10 champion tawh Djokovic chuan, "Inkhel awlsam tak a ni lo A bik takin set thumna-ah kha chuan min nawr na hle. Halys khan forehand ṭha tak a neih bakah min nawr reng avangin hmachhawn a khirh khawp mai," a ti.

Mipa single inkhel dangah world number 2 Andy Murray chuan 6-0, 6-4, 6-1 in Sam Groth chu darkar khat leh minute 30 chhungin a hneh ve bawk.

Rod Laver Arena-ah kum 28-a upa Groth hian tennis a khelh hun chhunga a service nat ber ṭum tawngin 163mph-a na ten vaw thei mah se Britain number 1 lakah hnehna a chang zo chuang lo a ni.

Grand Slam vawi hnih champion tawh Murray hi Australian Open-ah hian a vanduai thei hle a, kum 2010, 2011, 2013 leh 2015 te khan final lut vek mah se a chak lo zawkah a ṭang vek.