Copa del Rey Barcelona dinhmun a tha phawt

Nilaini zan khan Copa del Rey quarter-final first leg khelh a ni a, champion lai Barcelona chuan khualmualah 2-1 in Athletic Bilbao an hneh.

Barcelona hian an thiam-puipa Lionel Messi an hah-chawlhtir a, hrem vangin striker Luis Suarez a inlan thei lo bawk. Mahse, Athletic Bilbao khelmual San Mames Stadium-ah Munir El Haddadi leh Neymar ten first half-ah goal an khung a, hun tawp dawnah mualneitu lam tan Aduriz Zubeldia chuan goal khat a khung ve bawk.

Catalan club goal hnihna khungtu Neymar hian Athletic Bilbao hi a ngam hle a, an intawn hnuhnung vawi ngaah goal ruk a khung ta.

Inrinni zan hian La Liga-ah Barca hi Malaga khelmualah an zin chhuak anga, kar leh Nilai zan khian Copa del Rey quarter-final second leg chu Nou Camp-ah an khel leh ang.

Barcelona head coach Luis Enrique chuan, "Messi-a'n hliam a nei lo a, chawlh hahdam a mamawh avangin kan chawlh tir rih mai a ni. Goal khungtu Munir ka lawmpui a, training-na lamah a theihna san zia a pholan tawh avangin khelmual chhungah a rah kan hmu, goal dang pawh a la khung zel ang," a ti.

Atletico chak zo lo

Inkhel dangah Atletico Madrid chu Celta Vigo khe-lmualah an chak zo lo a, goal lut loin an ṭin. Karleh Nilai zan khian Vicente Calderon-ah second leg an khel ve leh ang.

Tun thla tir lam khan Celta Vigo khelmual Estadio de Balaidos-ah hian team pahnihte hi league match-ah an lo intawng tawh a, hemi ṭum hian Atletico-in 2-0 in hnehna an chang. Mahse, Copa del Rey-ah erawh result a danglam.

Atletico tan striker Jackson Martinez leh midfielder Augusto Matias Fernandez ten goal khungna hun ṭha nei mah se an chhawr ṭangkai thei lo a. Celta Vigo tana Iago Aspas goal khung ngei tur nia lang chu goalkeeper Miguel Angel Moya-a'n a lo dan sak bawk.

Atletico Madrid coach Die-go Simeone chuan, "A nih-na takah chuan keini aiin an khel ṭha zawk a, ball pawh an chang tam zawk. Tunah chuan kan hahchawl phawt ang a, chumi hnuah round sang zawk thlen ngei tumin kan inbuatsaih chhunzawm ang. Kan khelmuala inkhel tawh tur kan nih avangin goal kan khung tawh ngei ka ring," a ti.