Newcastle United tana intiam Jonjo Shelvey

January transfer-a Newcastle United-in pound maktaduai 12-a an lei midfielder Jonjo Shelvey chuan a man phu tawk ngeia khelh chhuah a tum thu a sawi a, manager Steve McClaren-a hnuaiah hlawhtlinna tam tak chhar theih a inbeisei thu a sawi.

England international hian kar hmasa Inrinni khan West Ham 2-1 a an hnehna inkhelah Magpies tana a match hmasa ber a khel a, Liverpool midfielder hlui hian a khel ṭha hle.

Kum 23-a upa midfielder chuan, "Fan-te hian kartluanin rim takin ticket man neih nan hna an thawk a, player tan chuan kan inkhel en tura an lokal hi a lawmawm em em ṭhin. Chhungkaw din-hmun harsa tak aṭanga sei lian ka ni a, he club tana player ṭangkai tak ka nih theih ka beisei. Fan-te hnenah hian ka theihna tak tak pholan hlan ka nghakhlel hle a ni," tiin St. James Park-ah chet ṭhat a tum.