Rawlthar player zingah Pogba a ṭha ber - Pirlo

New York City midfielder Andrea Pirlo chuan Juventus tana a khelhpui ṭhin Paul Pogba chu khawvela rawlthar football player zinga ṭha ber a nih thu a sawi.

Pirlo leh Pogba hi Antonio Conte hnuaia Juventus-in 2013-15 inkara Serie A league title ṭum thum an chawi ṭuma player pawimawh an ni a, season hmasa khan Italian midfielder hian US lam a pansan ta a ni.

Italy tana vawi 116 inlan thei Pirlo chuan, "Pogba hi khawvela footballer naupang tak tak ka hmuh zinga player ṭha ber a ni a, a training session hmasa berah khan player ropui tak a ni tih hi ka hre daih tawh a ni. Player sa pan tak ni mah se a ke a hman thiam em avangin a duhna berah a lo awm hman zel. Tunah phei chuan a taksa pawh a lianin a hma aiin a chak tawh zawk a ni," tiin French midfielder chuan hma a la sawn dawn chauh nia a hriat thu a sawi.

Pogba nena khaikhin hlawh fo Pirlo chuan tun hnaiah Lazio midfielder Danilo Cataldi leh Paris Saint-Germain midfielder Marco Verratti-te nena khaikhin an ni chu a duh loh thu sawi chhuak bawkin, "Cataldi nen hian kan khelh dan a in ang lo a, Verratti nen pawh a in ang lo. Mahse, Verratti hi chu national team-ah kum 20 chhung khel turin theihna a nei a ni," a ti.

Pirlo chuan tun hnaiah player tam takin first team an chang ṭan chauha hlawhtling emaw an in ti ṭhin chu pawi a tih thu sawiin, khelmual pawn lam aia khelmual chhung ngai pawimawh ṭhin turin player-te chu a fuih.