Tlai dar 2:00-ah Aizawl FC Vs DSK Shivajians Point thum hmuh a hun ta e - Manuel Retamero

Aizawl FC-in vawiin tlai dar 2:00 hian anmahni ang bawka team thar DSK Shivajians an hmachhawn dawn.

Aizawl FC-in I League match hmasa bera Mohun Bagan an hneh loh ṭumin second half ṭha takin an khel a, first half-a goal thum an chhuah vangin an chak lo. Mizorama I League match hmasa berah Aizawl FC-in 2014 champion Bengaluru lakah minute 90 chhung khel ṭha mah se goalkeeper Soram Anganba Poirei vawi khat chetsual an chak loh pui.

Point la hmu lo Spanish coach Manuel Retamero chuan vawiin hian Rajiv Gandhi Stadium, Mualpuiah Mizo mipui tan point thum hmuh ngei an tum thu Vanglaini palai a hrilh.

Mizo club tan

Aizawl FC fixture a fuh lo a, match hmasa pahnihah I League season hnuhnung champion an khelhpui nghal a, point la hlawh chhuak lo mah se an khelh dan faktu an tawng tam hle.

Aizawl FC coach Manuel chuan, "Bengaluru nena kan khelh dan anga DSK kan hmachhawn theih chuan kan chak ka ring. Tunah chuan hun kal tawha kan result dah ṭhat a, hmalam chauh kan thlir a ṭul. Mizo mipui tan, club tan, player tan leh ka tan chak result neih ngei a ṭul a, Aizawl FC tan point thum hmuh a hun ta e," tiin Mizo mipui tana chak an tum thu a sawi.

Spanish coach berin Mizo mipui tan chak a duh a, Mizo mipuiin Aizawl FC an ṭawiawm dawn em tih hi zawhna awm chu a ni. Bengaluru leh Aizawl FC inkhelh
ṭumin mipui ṭhahnem takin inkhel an thlir a, player tiphur turin thawm an nei lo. Aizawl FC-in point thum an hlawhchhuah theih nan Mizo mipui kawr sen ha chunga thawm an neih a ṭul ta.

Hei le, 4-4-2

Aizawl FC boss Manuel chuan Bengaluru an khelh anga an khelh leh phawt chuan an chak ngei a ring a, goal khung a duh avangin striker pahnih a hmang tawh dawn. Aizawl FC tlar hmaah MPL4 best player F. Lalrinpuia leh Alfred Kemah Jaryan-te an inkawp dawn.

MPL champion tan hian Japanese midfielder Yuta Kinowaki a inlan thei tawh dawn a, goalkeeper Poirei erawh inhliam vangin a inlan thei dawn lo. MPL best goalkeeper Lalawmpuia emaw Zothanmawia kan hmu ang.

Spanish coach-in defender Lalruatthara leh Lalramchullova a fak a, defe-nce-ah player a thlak dawn lo niin a lang.

Chak tum DSK

Goan coach tawnhriat ngah Derrick Pereira hnuaia khel DSK Shivajians hian awmze neiin football an khel a, an squad a chhah tawk lo tih hriain Sporting de Goa an khelh ṭumin defensive game khelin point khat an hlawh chhuak.

National Football League season tawp bera Mahindra United champion puitu coach Pereira chuan, "Attacking game kan khel dawn a, defensive lam kan hlamchhiah dawn tihna erawh a ni lo. Aizawlah hian point hmu turin kan rawn kal," tiin a sawi.

Aizawl FC tana thu lawmawm chu DSK-in an French defender lei thar Jeremy Labor an la chhawr thei dawn lo. Chutih rualin tlarhma lamah Cameroon striker Aser Pierrick Dipanda Dicka leh 2009-10 I League-a Indian player zinga goal khung tam ber Mohammed Rafi an kawl a, goalkeeper Subrata Paul an nei bawk nen - hming en mai chuan Aizawl FC aiin an la ṭha tho.

Kai thar ve veah DSK leh Aizawl FC an danglama, Pune khaw club DSK hi chu an relegate ve thei lo. DSK Shivajians hian an khingpui aiin pressure an nei tlem zawk a, vawi hnih chak tawh lo Aizawl FC-in chak an duh - inkhel a hmuhnawm dawn.