RG Stadium-ah India keeper Subrata

India keeper zinga hming langsar ber chu Subrata Paul a ni a, Bengali keeper hian ram tan vawi 64 zet a khel tawh. Kum 29-a upa Subrata hi vawiina Aizawl FC hmaa ding tur DSK Shivajians goalkeeper a ni.

DSK-in an match hmasa bera Sporting de Goa an draw ṭumin Subrata hian goal a chhuah lo a, Sporting Goa tana Odafa Okolie, Mahmoud Amna leh Marcus Mascarenhas-te goal khung tur a dan chu keeper ṭha bik tan chauha dan theih a ni hlawm.

I League kai thar tan Subrata hi player pawi-mawh a ni a, a hmaa ding player pahnih Zo-hmingliana Ralte leh Justin Stephen-te hi tawnhriat nei ṭha player an ni.

Ram-hlun South tlangval hi Shillong Lajong leh Pune FC tan a khel tawh a, ISL-ah NE United tan a inlan bawk. Zotea kawppui Justin Stephen hi ISL Season 2 champion Chennaiyin FC squad-ah a awm a, khelhna hmun a chang lo. Amaherawhchu Kerala defender hi Ma-hindra United, Prayag United, Mumbai FC leh Mohammedan-ah te a tal kual tawh a, Sporting de Goa striker Odafa Okolie hmaah pawh a rintlak hle.

DSK midfield khaipa ber Zohib Islam Amiri hian an ram Afghanistan tan vawi 55 a khel tawh a, a kawppui Ivorian mid-fielder Douhou Pierre hi a naupan laiin Emmanuel Eboue leh Salomon Kalou-te nena academy khata awm ho ṭhin a ni a, a ṭhiante angin Premier League class ni lo mah se I League khel tur chuan a ṭha tawk. Douhou Pierre hi 2011-12 season-a Pune FC Player of the Year a ni.

Sporting Goa an hmachhawn ṭuma winger Mohammed Rafi leh Indrajeet Chougale te an khel ṭha hle. Kum 33-a upa Rafi hian India tan pawh a lo khel tawh a, kum 21-a upa Indrajeet erawh hming la chher chawp tur a ni thung.

DSK captain Aser Pierric Dipanda Dica hian India rama a match hmasa berah goal la khung lo mah se La Liga club Valencia B team tan pawha khel tawh a ni a, Aizawl FC hi I League-a a goal hmasa ber khung nan a hmang thei tlat. Cameroonian hian jersey no. 9 a ha dawn a, chin-chhiah bik a sual lo ang.