Guardiola-a'n Van Gaal nge a thlak dawn Pellegrini?

French journalist Thierry Marchand chuan kar liam ta khan Paris-ah Manchester United hotute leh Pep Guar-diola an inbiak thu a ziak a, Red Devils lamin thuchhuah siamin thudik a nih loh thu an puang nghal.

Spanish coach Pep Guar-diola hian season tharah Premier League club a zawm dawn tih a chiang tawh a, Manchester City chu rinkai a ni. Manuel Pellegrini chuan nomawi meuh pawhin a hmalam hun a tichian loh thu a sawi tawh. Manchester khaw club pakhat zawk United coach Louis van Gaal hian kum 2017 thleng contract a nei a, an game khelh dan hmang leh result a ṭhat tawk loh avangin a dinhmun a him bik lo. Manager pahnih tan hmalam êng zawk nei turin result ṭha neih a pawimawh.

City vs Hammers

Point 43 hmua pathumnaa awm mek Manchester City-in Upton Park-ah West Ham an tlawh dawn. Hammers hian Etihad Stadium-ah City hi 2-1 in tun season-ah an lo hneh tawh a, match hnuhnung berah Newcastle United 2-1 in hneh lo mah se Slaven Bilic hote hi an inringtawk khawp ang.

Croatian coach Bilic chuan, "Sergio Aguero hi khawvel striker ṭha ber zinga mi a ni. A finishing leh a chet dan zawng zawng hi a awihawm loh hial zawk," tiin City forward Sergio Aguero a fak.

City hi Premier League-a goal khung tam ber niin goal 43 an khung tawh a, Argentine forward hian chung zinga goal 10 chu a khung. Amaherawhchu West Ham defensive record a nep bik lo tih hriat tel a ṭha, Premier League match hnuhnung pakuah goal ruk chiah an chhuah.

United Vs Saints

Manchester United-in tun season-ah Southampton chu St Mary's Stadium-ah 3-2 in an hneh hram a, January 2015-ah erawh zanina an inkhelhna tur Old Trafford-ah Saints 1-0 in an chak thung.

United captain Wayne Rooney-a'n match hnuhnung paliah goal nga khungin player en bik tur a ni dawn a, Southampton aṭanga United zawmtu Morgan Schneiderlin-a'n a vawi hnihna atan a club hlui a hmachhawn bawk ang.

Red Devils tana lawmna erawh Borussia Dortmund-a hlawhtling lo Adnan Januzaj a inlan a beiseiawm. Belgian winger hi Thawhṭanni khan Under 21 team tana a inlan a, first team tana khel turin a inpeih leh tawh.

Mipui thlir tur erawh United khelh dan hmang a ni dawn a, Red Devils supporter ten attacking football hmuh an duh. Louis van Gaal-a'n point thum bakah game mawi a khelh a ṭul tawh, a khingpui tur Southampton manager Ronald Koeman hi Ajax-a sporting director hna a chelh laia manager a ni. Dutch manager pahnih an inhrechiang a, player neih dan aṭanga chhut kher lo pawhin tun thleng chuan Koeman-a hnuaia khel Saints an hmuhnawm zawk.

Result ṭhat tawk loh hnua media nena inhmu thiam lo Van Gaal-a'n result ṭha a ma-mawh takzet a, a chetfuh loh zel chuan a contract neih lai hi a hmang zo thei lo ang.