Chhiah awl ruk vanga buai Javier Mascherano

Barcelona defender Javier Mascherano chuan chhiah awl ruk vanga kum khat chhung lungin tang tura tih a nih hnuah a zalen thei dawn niin a sawi a, Argentine mid-fielder chuan Spain thu-neitute nen inremna an nei tawh niin a sawi.

Kum 31-a upa Mas-cherano hian kum 2011-2012 inkar khan pound maktaduai 1.1 chhiah a awl ru a, Liverpool midfielder hlui hian puh anihna hi a lo pawm tawh nghe nghe.

Nikum khan Court chuan Mascherano hian a chhiah awl ruk hi a pung nen a rul tawh tiin thuchhuah an siam a, a lungin tan tur tih tawp a nih leh takah chuan pawisa a chawi belh leh dawn a ni.

West Ham tan pawha lo khel tawh Mascherano chuan, "Football player ve mai ka ni a, chhiah chungchanga dan leh hraite hi engmah hriat ka nei ve lo. Chuvangin hetiang thil vel khawih tur hian firm hran ka ruai a, an thiam loh a ni. Ka career chhung zawngah dik lo taka thil tih ka nei ngai lo a, mi rinawm tak ka ni," tiin chhiah chu a tum reng vanga awl ru a nih loh thu a sawi.

Mascherano khelhna Barcelona hian zanin dar 8:30-ah La Liga match khel turin Malaga chu an lenchilh ang.