Man United keeper Valdes a chhuak dawn

Manchester United goalkeeper Victor Valdes chuan season tawp thleng khel turin Belgian club Standard Liege a zawm dawn.

Kum 34-a upa goalkeeper hian January 2015 khan thla 18 chhung cham turin Old Trafford-ah hian contract a ziak a, mahse United manager Louis van Gaal nen an inhmuh thiam loh avangin English club tan hian vawi hnih chiah a inlan a ni.

Dutch manager Van Gaal chuan season ṭan dawn khan Valdes hi reserve team tana khel duh loah a puh a, USA lama pre-season tour an neihah pawh hruai a ni lo. Barcelona tan a khelh laia Champions League nomawi ṭum thum chawitu keeper hian Van Gaal nen an inhmuhthiam loh hnuah first team training a zawm tawh lo.

Spain-in 2010 World Cup leh Euro 2012 nomawi an chawi ṭuma squad zinga mi Valdes hian August thla khan Besiktas zawm tumin indawrna a lo neihpui tawh a, mahse Turkish club hi a zawm ta chuang lo a, a agent chuan January-a a chhuah tur thu hi a lo sawi lawk tawh a ni.