Liverpool-in Shakhtar forward an rim

January transfer-a thawm nei na lo Liverpool-in thawm an nei ṭan a, Merseyside club hian Shakhtar Donetsk attacking midfielder Alex Teixeira chu lakluh tumin an dawr.

Kum 26-a upa midfielder manah hian Reds lam chuan pound maktaduai 24.5 theh-chhuah an inhuam nia sawi a ni a, mahse Ukrainian club lam hian Chelsea nen pawha sawizawm hlawh mek midfielder manah hian pound maktaduai 39 vel an beisei a ni.

Liverpool hian tlarhmaah player an mamawh hle a, an hmatawng zingah Danny Ings, Divock Origi leh Daniel Sturridge-te chu hliam vangin an chawl mek a, pound maktaduai 32.5 man Christian Benteke-a'n beisei a phak lo bawk. Reds hian tun season Premier League match 22 an khelh tawh aṭangin goal 25 chiah an la khung.

Brazilian club Vasco da Gama-a a career ṭantu Teixeira hi tun season-ah Ukrainian club tan a che ropui hle a, league match 15 a khelh tawh aṭanga goal 22 khungin Champions League match sawm a khelh aṭangin goal li a khung bawk.

Klopp hian January transfer-ah player pahnih a la lut tawh a, Queen Park Rangers defender Steven Caulker chu season tawp thleng cham turin loan-in a la lut a, Red Star Belgrade rawlthar duhawm Marko Grujic chu pound maktaduai 5.1 in a la lut bawk. Kum 19-a upa midfielder hi Serbian club-ah hian season tawp thleng cham turin loan-in a kir tir leh thung.

Teixeira hian Anfield-a pan a nih chuan Reds Bra-zilian player plaina a ni dawn tihna a ni. Liverpool-ah hian Brazilian player pathum Lucas Leiva, Roberto Firmino leh Philippe Coutinho-te an awm mek a ni.

Hetihlai hian Liverpool chuan Swansea-in an mid-fielder hlui Joe Allen lak-let an tumna chu an hnawlsak. Welsh club hian kum 25-a upa midfielder hi loan-a laklet an duh a, Reds lamin August 2012-a pound maktaduai 15-a an lei midfielder hi chhuahtir an remti lo thung.