Tlai dar 4:30-ah Kolkata Derby

I League derby zawng zawnga ngaih hlut ber Kolkata Derby chu vawiin tlai dar 4:30 hian Mohun Bagan leh East Bengal ten Salt Lake Stadium-ah an khel dawn a, Ten Action-ah live a ni ang. Pathianni zan dar 7:05-ah Bengaluru FC leh Shillong Lajong te Sree Kanteerava Stadium-ah inkhel bawk dawn a, Mizo tamna team pahnih inkhel tur pawh hi Ten Action-a tihchhuah tho tur a ni.

Derby boruak

East Bengal midfiel-der S. Malsawmtluanga chuan, "Derby hi chu a dang bik a, player fitness ṭha pawh a boruaka zam tlat an awm ṭhin. Hetiang hun hi Mizo ṭhatna a ni a, keini chuan nuam kan ti a, kan theihna angin kan khel chhuak ṭhin," tiin Vanglaini palai a hrilh.

Mizo footballer entawn tlak Mama hian Kolkata derby-ah goal a lo khung fo tawh a, khelhna hmun a chang a nih chuan a ngaihtuahawm loh. East Bengal captain armband hreng tur hi Mizo tlangval Robert Lalthlamuana a ni a, Red & Gold hian Calcutta League-ah Bagan 4-0 in an hneh a, an champion zui avangin tun ṭum boruak hi a sang leh zual ang.

Mohun Bagan-in Jeje Lalpekhlua an nei thung a, anni hi I League champion niin foreigner ṭha pali Sony Norde, Cornell Glen, Yusa Katsumi leh Luciano Sabrosa te an kawl. Hnahthial tlangval Jeje hian team a zawm tlai avangin starting eleven a la chan a rinawm loh.

Kolkata Derby hi vawi 312 zet khelh a ni tawh a, East Bengal vawi 118 chakin Mariners vawi 87 an chak a, vawi 107 an inhnehtawk. I League-ah erawh vawi 16 khelh tawh niin Bagan vawi ruk an chak a, East Bengal vawi li chakin vawi ruk an inhnehtawk.