Lleyton Hewitt hun a liam ta

Lleyton Hewitt chuan Ningani khan a tennis career atana a single match hnuhnung ber a khel a, David Ferrer hneh loin Australian Open second round aṭangin vuak chhuah a ni.

Rod Laver Arena-a inkhelah world number 1 pawh lo ni tawh Hewitt hi David Ferrer lakah darkar hnih leh minute32 chhungin 6-2, 6-4, 6-4 in a tlawm.

Kum 34-a upa Hewitt hian kumin hi a zawna Australian Open vawi 20 a khelhna a ni a, kum 2005 khan final a lut a, mahse a chak zo lo thung.

Wimbledon leh US Open champion lo ni tawh Hewitt hian tennis a khelh hun chhungin title 30 zet a lak hman bakah Australia chu 1999 leh 2003 khan Davis Cup-ah a champion pui bawk.

Kum 20 mi chauh a nih laia world number 1 ni thei Hewitt chuan, "He hmuna ka inkhel thei hi ka lawm a, a zawna kum 20 chhung ka inkhel thei phei hi chu a hlu hle. Tunah chuan ka chawlh a hun ve ta a, ka rilru zawng zawng ka lo hman tawh ṭhinna chu ka chawlhsan va a
ṭul tawh a ni," tiin a sawi.

Khawvel mipa tennis player piang tawh zinga wolrd number 1 ni thei naupang ber an ui thu hi a player puite pawn an sawi chhuak nasa hle.

Roger Federer chuan, "Tennis tana i thil tih zawng zawngte avangin lawmthu ka hrilh che, nang leh i chhungkuain hun hlimawm in hman zui theih nan duhsakna ka hlan che," tiin a thlah.

Rafael Nadal chuan a tana player pawimwh bik a nih thu sawiin, "Ka tan chuan mi pawimawh bik i ni a, min fuih phurtu leh chona min siamsak tu ber i ni bawk. Keimah chauh ni loin naupang lo ṭhanglian zel turte tan pawh chona petu i nih zel ka beisei," tiin a sawi.