Zidane hian nomawi a chawi ang - Carlos

Real Madrid-a Zinedine Zidane nena khel dun ṭhin defender Roberto Carlos chuan a ṭhianpa chu Real-ah a hlawhtlin a rin thu sawiin fan-te tan nghah peih erawh a ngaih tur thu a sawi.

Kum 2001-2006 chhung Real tana an khelhdun laia Champions League nomawi leh La Liga title a lo chawipui tawh Zidane chung-chang sawiin Carlos chuan, "Zidane hian Santiago Bernabeu-ah nomawi a hawn ngei ang tih ka chiang a ni. La Liga-ah an khel
ṭha em em a, Champions League-ah pawh an talbuai lo ang," a ti.

Delhi Dynamos manager chuan, "A pawimawh ber chu Zizou a hnuaiah player-te an hlim a ngai a, nuam ti taka an khelh a ngai a ni. Zidane hian Real B team-ah tawnhriat a lo nei tawh a, a staff zingah mi fing leh rem hre tak tak a kawl nual a, a hlawhtling em em ang," tiin Real tana a khelhpui ṭhin Zidane chu a ring tawk hle.

Real Madrid-in Rafael Benitez an ban hnuah La Liga match hnih an khel leh tawh a, Zidane-a enkawlna hnuaiah chak ve vein goal sawm an khung a, goal khat chiah an chhuah thung.

Spanish club lian hian Pathianni zan dar 1:00-ah La Liga match khel turin Real Betis an lenchilh dawn a, Zidane-a hnuaia match thum an khelhna tur chiah a ni ang.