Federer-a'n mel lung a phun

Roger Federer chuan Grand Slam tournament-ah match 300 chak ni hmel hmuin mel lung pawimawh a phum. Nimin khan Grigor Dimitrov hnehin Australian Open third round a paltlang.

Rod Laver Arena-a in-khelah seeded pathumna Federer hian seeded 27-na Dimitrov chu 6-4, 3-6, 6-1, 6-4 in a hneh a, fourth round-ah seeded 15-na David Goffin a hmachhawn leh dawn.

Kum 34-a upa Federer hian Grand Slam inelnaah chak hnem lamah tluk loh pakhat chiah neiin vawi 306 chak thei Martina Navratilova hnung chiahah a awm mek a ni.

Swiss thiampuipa Federer hi kum 2004, 2006, 2007 leh 2010 te khan Australian Open-ah a lo champion tawh a, champion tam lemah Roy Emerson (6) leh Novak Djokovic (5) te chiah thluk loh a nei bawk.

Grand Slam vawi 17 champion tawh Federer chuan, "Grigor kha a khel ṭha viau a, min chaih buai hle. Set thumnaah a service ka chhuhsak theih thuai avang khan inkhelh a tih awlsam phah a, ka vanneih pui ta a ni. Match 300 chakni hmel ka hmu hi ka lawm a, ka match hmasa lam ka ngaihtuah let chuan hetiang hun ka thleng mai hi a mak ka ti zawk hial a ni. Ka lawm tak zet," a ti.

Inkhel dangah seeded pakuana Jo-Wilfried Tsonga chuan inkhel inhnehtawk takah Pierre-Hugues Herbert chu 6-4, 7-6, 7-6 in a hneh a, seeded pasarihna Kei Nishikori-a'n 7-5, 2-6, 6-3, 6-4 in Guillermo Garcia-Lopez a hneh ve bawk.