Mizo club Aizawl FC-in hnehna an chang ta

I League match thumnaah Aizawl FC-in harhtharna famkim an chang a, nimin tlai khan RG Stadium-ah DSK Shivajians 2-0 in an hneh. Aizawl FC tan Alfred Kemah Jaryan leh Yuta Kinowaki ten goal an khung a, captain David Lalrinmuana chu hero of the match atana thlan a ni.

Mizoram Premier League champion Aizawl FC hian match thum khelh aṭangin point thum hlawh chhuakin palinaah an invawrh chho a, amaherawhchu club dang aia an khelh tam avangin khelh zat inangah erawh table hnuai lama tla thei an la ni. Pune khaw club DSK Shivajians-in match hnihah point khat hmuin pasarihnaah an awm thung. Aizawl FC hian Thawhṭanni tlai dar 2:00-ah Sporting de Goa an mikhual ang a, DSK Shivajians-in Thawhlehni zan dar 7:05-ah Kolkata club East Bengal an tlawh thung ang.

AFC an tho

Aizawl FC-in ball an chang tam nghal a, mualneitu tan Soram Poirei aia lut keeper Zothanmawia'n hna em em nei lo mah se DSK-in goal hlauawm an nei ngun zawk.

Minute 18-naah Aizawl FC-in inkhel an thununna chu goal-ah an chantir a, box chhunga vengtu nei lo Alfred-a'n DSK keeper Subrata Paul dan phak loin goal hrulah a dah. Aizawl FC game a mawi chhunzawm a, midfield-a David Lalrinmuana leh Yuta Kinowaki te inkawp hmangin inkhel an thunun.

MPL champion tan winger pahnih Brandon VL Remdika leh Albert Zohmingmawia te an khel ṭha bawk a, Aizawl FC-in goal chance an ngah malh malh hle. DSK chhanhimtu chu Mizo tlangval Zohmingliana Ralte leh goalkeeper Subrata te an ni.

First half injury time-ah Yuta-a'n goal ṭha bik a khung a, David-a corner pet per chhuak chu a volley goal chiang hle. Aizawl FC-in first half-ah 2-0 in hma an hruai a, second half chanve lamah 4-4-2 aṭangin 4-5-1 formation hmangin inkhel thunun takin hun an hmang tluang.

Aizawl FC-in defen-sive game an khelh hnuah pawh DSK aiin goal chance an la ngah zawk a, goal erawh an khung belh thei tawh lo. Pune khaw club DSK-ah Mizo pahnih an awm a, Zotea a khelṭha tluan a, second half-ah Lalhmangaihsanga Ralte a rawn inlan bawk.

Retamero a lawm

Aizawl FC coach Manuel Retamero chuan, "DSK kan hnehna hi Mizo mipui tan a ni a, player tan a ni a, club chhunga member zawng zawng tan a ni. Hmasawnna tur chu awm bawk mah se tun
ṭuma kan khelh dan aia ṭhaa khelh dan hi a awm chuang lo a, kan inkhelh leh turah pawh tuna kan khelh dan ang thoa kan khelh theih hi a ṭul a ni," tiin an chakna chu a sawi lawk tawh angin Mizo mipui tan a hlan.

DSK Shivajians coach Derrick Pereira chuan, "Inkhelh ṭan tirh lamah goal khungna chance kan ṭha kan nei a, khung ni ila chuan result danglam thei a ni. Chutihrualin Aizawl FC kha team ṭha zawk an ni tih ka pha lo a, keini aiin kawng engkimah an chungnung zawk a, chak phu zawk an ni," tiin Aizawl FC khelh dan a fak hle.

Coach tawnhriat ngah Pereira chuan sawi zelin, "Relegate thei lo mah ila, result ṭha neih kan duh avangin pressure nei loa khel kan ni lo. Match hnihah goal kan la khung lo a, Thawlehnia East Bengal kan hmachhawn turah tuna kan player neih ang hi ṭha zawka kan rem a ṭul dawn a ni," a ti.

DSK Shivajians hi Bengaluru FC te ang thoa team dang entawn tura I League-a dah luh an ni a, season khatnaah an relegate ve thei lo.