OOOho le... Odafa Onyeka Okolie kan hmu dawn
Footballer ṭhenkhat chu chanchinbu leh tv kaltlanga sawi vul chawp ngaite an ni ṭhin a, tun ṭuma a chanchin kan tarlan tur Nigerian striker Odafa Onyeka Okolie erawh a goal khung hmangin India ramah a hming chher a, goal vang bawkin India ram footballer zinga hlawh tam ber nihna a lo hauh tawh. Thawhṭanni tlai dar 2:00 hian Rajiv Gandhi Stadium, Mualpuiah Aizawl FC-in Sporting de Goa an mikhual dawn, Goan club striker feet 6-a sang Odafa hian en bik a hlawh dawn - enna tur ticket i nei tawh em?
Nuai 300 maw?
Media lam tarlan dan a ni miau si, Nigerian striker Odafa hian kum 2011-a Churchill Brothers aṭanga Mohun Bagan a zawm khan, kum thum chhung atan kum tin nuai 300 hlawh turin contract a ziak a, heng bakah hian bonus a la nei cheu!
Mariners fan lam pawhin I League ṭan tirh season hmasa pathuma top scorer ni thei an la lut thei chu an lawm ngang a ni ang, Odafa thlalak tarlanna jersey ‘MOM’ (Mariners on The Move) tih inziahna chu an zuar chhuak nghal. Mizoramah player pakhat puala jersey siam vanga Aizawl khawpui ngawr nghing pha an awm lo a, Odafa puala jersey erawh Kolkata mipui titi tling pha a ni. Hriat tel ṭul chu football bikah chuan khatih hunlaia Kolkata-a an sawi hat chu, India ram pum huap titi tling pha a ni a, chu chuan Odafa boruak len zia chu a tichiang mai awm e.
Odafa leh Goal
India rama foreigner ṭha tam tak hian anmahni inzawrh nan naupan laiin khawvela huapa lar pha nena an khelh ho tawh thu an sawi ṭhin a, Odafa erawh a hun hmalamah chhuan tur a nei lo.
Nigerian forward hian kum 2003 khan Mohammedan a zawm a, season khat chhungin khelhna hmun a chang lo. Kolkata vawi khat tlawhnaah hming a chher zo lo a, Bangladesh club Muktijoddha SKC club zawmin match 28-ah goal 34 a khung.
Bangladesh-ah kum khat chauh a awm hman tihin National Football League aṭanga tla thla thlim Churchill Brothers-in an la lut a, season khatnaah che ṭha tawk lo mah se Goan Club hi NFL-ah an inpet tling. 2006-07 season-ah Odafa a inlar
ṭan a, goal 12 khungin Churchill chu team 10 awmna NFL-ah palina an ni.
I League hmasa ber chu 2007-08 season aṭangin khelh ṭan a ni a, goal 22 zet khungtu Odafa chu top scorer hmasa ber a ni. A khelhna Churchill Brothers erawh Goan club tho Dempo nen an point hmuh zat inang chiah mah se goal difference-a an tluk loh avangin pahnihnaah an lungawi a ṭul.
I League season hnihnaah Odafa a ropui chhunzawm a, goal 26 zet khungin top scorer a nih bakah Churchill Brothers a champion pui bawk. 2009-10 season-ah Nigerian striker hian goal 22 lawih khungin top scorer ni leh mah se Churchill Brothers-in Dempo bawk tluk loin pahnihna an ni. An champion kum hian mimal lawmman sem ṭan a ni a, Foreign Player of the Year leh Fans Player of the Year-ah thlan ni a, pahnihna an nih ṭum pawh hian Foreign Player of the Year-ah thlan a la ni tho.
2010-11 season-ah Odafa-a'n goal 22 a khung a, amaherawhchu hemi season hian Salgaocar an champion a, Dempo striker goal 30 zet khungtu Ranti Martins chu top scorer a ni. Nigerian striker Ranti hi Odafa ang thoin kum thum chhung a zawnin I League top scorer a ni a, season liam ta khan top scorer ni lehin I League-a top scorer ni ngun ber record hauhtu a ni.
Goan club tana I League-a goal 95 a khung hnuah a hmaa amah hret lotu Kolkata mipuiin lal hmuahin an lo hmuak a, Mohun Bagan tana a match hmasa berah Pailan Arrows lamah hattrick a siam nghal a, Kolkata club tana a I League season khatnaah goal 26 zet a khung nghal. Kolkata mipuiin Nigerian striker hi ngaisang viau mah se Mariners tan erawh kum thum chhungin I League nomawi a chawi lo.
Odafa a la vul
Odafa hi a inhliam ve tak fo avangin Mohun Bagan tana season thumnaah goal a khung tam tawk lo a, season liamta khan Sporting de Goa tan khel ṭanin hliam vang bawkin season bul a ṭan lo bawk. Season tawp lamah erawh Nigerian striker hi I League aṭanga relegate tawh tura ngaih Sporting Goa chhanhimtu a ni.
Odafa hian Sporting Goa tan goal riat a khung a, heng goal-te hi match hnuhnung pariata a khung a ni. Nigerian striker hian Salgaocar, Mohun Bagan, Shillong Lajong leh Pune an hneh ṭumin goal pawimawh a khung. Heng zinga langsar ber chu a club hlui Mohun Bagan 2-1 a an hneh ṭuma goal hnih a khung hi a ni a, Mariners hian champion nomawi an thlauh leh teuh hle. Odafa goal hnih vang hian Bagan-in an match hnuhnung berah Bengaluru an draw a ngai a, minute 87-naa Bello Razaq goal hmangin an champion hram.
Nikum season tawp khan East Bengal-in season khata nuai 100 hlawh turin an sawm tih thawm a awm a, an indawrna a kal fuh tawk lo a ni ngei ang - tun season-ah Sporting Goa tan bawk a khel. Match hmasa berah East Bengal lamah goal a khung nghal a, match hnihnaah DSK Shivajians lamah goal khung lo mah se a class san zia a la lang tho. Thil danglam bik a thleng a nih ngawt loh chuan tun season-ah Odafa hi Aizawl-ah vawi khat chiah a rawn khel ang. Thawhṭanni chawhnuah Mizo tlangvalin I League-a goal 155 khung tawhtu Odafa dan an tum dawn a, en leh en loh chu mimal thutlukna a ni.
I League bika Odafa goal khung dan
Season Club Goals
2007–08 Churchill Brothers 22
2008–09 Churchill Brothers 26
2009–10 Churchill Brothers 22
2010–11 Churchill Brothers 25
2011–12 Mohun Bagan 26
2012–13 Mohun Bagan 19
2013–14 Mohun Bagan 6
2014–15 Sporting Goa 8
2015-16 Sporting Goa 1
Total 155