Arsenal hmaah Chelsea an ding dawn

Premier League hma-hruaitu Arsenal chuan Pathianni zan dar 9:30 hian champion lai Chelsea chu Emirtaes Stadium-ah an lo mikhual dawn.

Arsenal tan champion nomawi chawi leh chawi loh hril theitu a nih tawh laiin Chelsea tan erawh a sang pali zinga tel phak tura beiseina insiamna hun a ni thung. Tun dinhmuna team pahnihte inthlauhna chu point 19 zet a ni mek.

Record ṭha lo chu

Chelsea hian manager Jose Mourinho enkawlna hnuaiah hun duhawm lo an hmang a, ani thlak tur hian Guus Hiddink an ruai. An manager lai-lawk hnuaiah hian lea-gue match ruk khel tawhin tlawm an la nei lo. Amaherawhchu, tun season-ah Blues hian goal 34 an chhuah tawh a, season hmasa pumpuia an goal chhuah aiin goal hnihin a tam tawh zawk.

Hetih mek lai hian Arsenal pawh inchhuang thei an ni bik lo. Chelsea lakah hian darkar riat leh minute hnih chhung goal an khung tawh lo.

Kum 1997 aṭanga 2000 inkar khan Gunners hian Liverpool lakah match ruk chhung goal an khung lo a, Premier League chanchinah an khingpui club mal lakah goal an khung loh zawn rei ber ṭum a ni. Zaninah hian goal an khung lo leh a nih chuan he an record lo siam tawh hi an nihrual leh chiah dawn a ni.

Thuthar

Nikum November thla a malpui a tih nat avanga la inkhel leh lo forward Alexis Sanchez leh ke na vanga an match hnuhnung ber khel lo Mesut Ozil leh midfielder Francis Coquelin te chuan Ningani khan team training an zawm leh tawh a, Arsenal tan chanchin lawmawm a ni.

Chelsea tan season hmasa an champion theih nana thawhhlawk ber pawl Eden Hazard chu kar thum zet a inkhelh theih loh hnuah a lo kir beisei a ni a, striker Diego Costa a dam ṭhat bawk avangin player langsar zingah Radamel Falcao chiah inkhel thei lo tura ngaih a ni.