Excise dept.-in kuminah heroin an man hnem; Kum 3 chhunga an man zat vel an man tawh

Excise & Narcotics department (END) chuan kumin chhung (August 31 thlengin) heroin kg. 63.37 an man tawh a, hei hi tunhnai kum 3 chhunga an man zat vel a ni.

END hian heroin hi kum 2022 khan kg.33.41 an man a, 2021-ah kg. 18.90 manin, 2020-ah kg. 11.70 an man. Kum 3 chhunga heroin an man belhkhawm hi kg. 64.03 niin, kumin chhunga man tawh kg. 63.37 nen a inzak thuak.

August 31, 2023 hnu lama an man leh nen chuan tunhnai kum 3 chhunga man aiin, kumina heroin man tawh chin a tam tawh zawk.

END aṭanga thudawn danin, heroin a tam avangin a man (rate) pawh a tlahniam chak a, a man a tlawm avangin heroin nghei tawh ti nawn leh bakah la ti ngai lo ti thar pawh an tam phaha hriat a ni.

Heroin hi tunhma chuan hawng khat Rs. 50,000 man vel a ni ṭhin a, a hnu deuhah Rs. 20,000 - Rs. 30,000 niin, tunah chuan Rs. 15,000 a lei turte pawh a awm tawh.

A hlawm liantham deuh mante chu a tlangpuiin state pawna hralh tura Myanmar aṭanga lak a ni ṭhin. Heroin mansak zingah Myanmar mi leh state pawn lam mi an tam.

Hetihlai hian END chhinchhiah danin, kumin (September 14 thleng) chhungin Mizoramah ruihhlo vanga nunna chân mi 52 an awm tawh a, mipa 40 leh hmeichhia 12 an ni. Ruihhlo vanga nunna chânte hi heroin kaihhnawih veka thi an ni.

Nikum chhung khan ruihhlo vangin Mizoramah mipa 39 leh hmeichhe pali, an vaiin mi 43 an thi a, anni ho pawh hi heroin kaihhnawih vanga thi vek an ni.