North London Derby: Arsenal khelmualah Tottenham Hotspur

"Season khat chhunga kan inkhel boruak lian ber a ni," tiin Arsenal manager Mikel Arteta chuan Tottenham Hotspur nena an inkhelh tur chuangchang a sawi. North London club pahnihte hi Pathianni zan dar 6:30 hian Emirates Stadium-ah an inkhel ang.

Premier League bikah chuan Gunners leh Spurs tan an pahnih inkhelhna hi a boruak a lian, veng khata awm an nih avangin a lian leh ropui zawk nih an inchuh reng a, a tawi zawnga sawi chuan an inngaisang lo tawn hle - a ṭha zawk niah an inngai hmiah.

An phur takzet

Arteta-a'n team a din nghet ta viau a, season hmasa khan champion phak ta chiah lo mah se kuminah an ṭha lehzual tawh niin a lang. Nimin khan captain Martin Odegaard chuan season nga daih contract thar a ziak - Champions League lama an result ṭha nen an phur vanglai tak a ni.

Arsenal manager Arteta chuan, "Hliam vangin Thomas Partey a inkhel thei dawn lo, midang erawh an ṭha. Gabriel Martinelli dinhmun ngaihchan a ni bawk," tiin a naute chu Tottenham hmachhawn turin an inpeih tih a sawi a, an ṭhat dan takin an khel thei dawn niin a lang.

PSV an hneh ṭumin player ṭha ṭhenkhat chu hun tawp hmain a la chhuak, zaninah Declan Rice hoin midfield an inrem leh ang a, tlarhnungah William Saliba leh Gabriel te an inkawp leh ang - si ban nghak turin Aaron Ramsdale aiin David Raya a luh leh a rinawm.

Season hmasa an intawn vawi hnihah Arteta naute hi an chak ve ve a, tun ṭuma an inkhelhna tur hi Emirates Stadium a nih bawk avangin inrintawkna an nei sang dawn a, chutihrualin derby boruak hi chu a danglam ṭhin avangin ngaihṭha taka awm a rem lo.

Kane awm lohna

Tottenham hian an club tana goal khung hnem ber Harry Kane an chelh thei lo - England captain hian champion duh vangin Bayern Munich a pan san. Kane chhuah hnuah an tlarhma a bil dawn niin a lang a, mahse tun season EPL goal khung tam pathumna an ni mek.

Arteta chuan, "Kane awm lo chu danglamna lian tak a ni, mahse ani tel lo pawhin player ṭha tak tak danglamna siam thei an nei tho. Hun rei lo te chhungin Kane tel loin team an insiamrem thei mai te hi a mak zawk hial.

"Coach Ange Postecoglou hian hna a thawk ṭha takzet a, player zawng zawng nghet takin a phuarkhawm niah ka ngai. Chuvangin tun hma lama Spurs ang ni loin, team thar hmachhawn tura kan inbuatsaih a ngai," a ti.

Captain Son Heung-min, Richarlison leh Dejan Kulusevski te thlawp turin James Maddison an nei thar bawk - English midfielder hian danglamna a thlen nasat avangin Gunners tlarhnung tan ven uluk a ngai dawn - Rice nen midfield thununtu nih an inchuh ang.

Spurs thar

Hringnun kan hman dan a inang vek lo, mi ṭhenkhat tan bul ṭanna sang tak leh awlsam a awm laiin, ṭhenkhat erawhin harsatna hrang hrang an paltlang hmasak a ngai ṭhin - raltlan camp thlenga awm tawh Ange Postecoglou hian North London thleng turin thil a paltlang hnem.

Kum 58 mi a ni tawh a, tun hmain club 10 ngawt a enkawl tawh. Celtic aṭangin Spurs a zawm a, atan chuan thil mak a tling. Athens khawpuia piang - Australia rama seilian Postecoglou chuan, "A nihna takah chuan he hmun hi ka thlen ka ring ngai lo.

"Spurs ka enkawl a ni satliah lo a, tunah hian Premier League table-ah pahnihna kan ni mek. Ka naute hian an hna ṭha takin an thawk a, ka tui ang chiahin attacking game khel turin theihna an nei, hei hian min ti lawm," tiin a sawi.

Postecoglou hian ṭha taka khelh ringawt chu an thil tum a ni bik lo tih a sawi a, kum tam tak hnuah Tottenham hian nomawi an chawi leh ngei theih nan theihtawp an chhuah tih a sawi bawk - a hmasa ber atan Arsenal hneh an chak ngawt ang.