Match 50 chak thei Klopp

Liverpool manager Jurgen Klopp chuan Europa League-ah a naute chu LASK lakah 3-1 in an chak pui a, European football bikah Reds hi match 50 a chakpui tling ta chiah - Rafa Benitez nen record inṭawm an neih chu a kalsan.

Benitez hian kum 2004 aṭanga 2010 chhung khan European football-ah Liverpool hi vawi 49 a chak pui - Champions League nomawi pawh an chawi, he record ṭha tak hi Klopp chuan rawn khumin tunah chuan a chungnung ta ber.

Ningani zan inkhelah Liverpool hi awlsam takin an chak mai bik lo. Klopp-a'n Premier League lama a chhawr rim ngai loh hlir an lut, captain Virgil van Dijk chu league lama hrem mek a nih avangin a chhawr bawk.

Austrian club LASK lamin midfielder Florian Flecker hmangin goal an khung hmasa a, second half-ah Reds tan Darwin Nunez chuan penalty aṭanga a sut bakah Luis Diaz leh substitute Mohamed Salah ten an khung belh bawk a ni.

Klopp chuan, "European football match khelh tur hi tun hma aiin a tam tawh a, chutihrualin hetiang zat kan chaka final hial kan thleng ṭhinte hi a lawmawm hle, hmabak erawh kan la ngah hle.

"Tunah match 50 kan chak tling ta a, thil lawmawm tak pawh a ni. Amaherawhchu, group stage kan khelh zawh hunah pawh hnehna kan chan zat hi a la pangngai reng a nih chuan min ṭantute hi an lawm miah lo ang," a ti.

Reds hian Pathianni zan dar 6:30 hian Premier League an khel zui dawn, anmahni ang bawka Europa League khel chau West Ham nen Anfield-ah an intawng chhunzawm leh nghal dawn a ni.