Chhingcows chakna Ephraim-a freekick

Chhinga Vengin Kolasib-ah hnehna an chang a, Ephraim Lalremtluanga freekick mawi zet hmangin Electric Veng FC 1-0 in an hneh. Zote Toyota MPL10-ah Chhingcows-in point riat an hmu a, palina zingah la awm lo mah se semifinal khel pha china awm Aizawl FC nen an point hmuh zat a inang chiah.

Lalsangzuala Hmar kaihhruai Chhingcows tan captain MS Dawngliana a rawn kir a, Bawngkawn forward hi Electric Veng tlarhnung tan a hnawksak hle. Chhingcows-in chance an nei ṭha zawk a, goal khung an harsat thung. Minute 65-naah Champhai tlangval Ephraim-a'n danglamna a rawn thlen a, box pawn chiah aṭangin freekick a pet goal. Ephraim-a hian goal kilah ball hi a dah a, Electric Veng keeper Lalrinzuala'n ding chungin a en liam.

Ephraim hian hun tawp dawn hnaiah freekick aṭang bawkin crossbar a pet per a, hun tawp hma hretin Lallawmsanga'n (Lsa) goal khungna remchanga nei a, keeper Rinzuala'n ṭha takin a dansak. Chhinga Vengin an phu angin point thum an hlawh chhuak a, semifinal beiseina a nung thar leh ta bawk.