Ṭantu nei ṭha Project Veng an chak

Project Veng FC-in an khawtual Kolasib Sports Stadium-a an khelh meuh chuan Zote Toyota MPL10-a a vawi khat nan hnehna an chang ta. Kolasib club hian nimin tlai khan FC Venghnuai an hmachhawn a, 1-0 in hnufual mah se 2-1 in hnehna an chang.

Nikum finalist Venghnuaiin table mawngphah chhuahsan ngei tumin bul an ṭan ṭha a, Eric Remruatpuia Chhangte hmangin minute hnihna lekah hma an hruai. Amaherawhchu, Kolasib mipuiin Project Veng an au phur a, minute 15-naah Samson Haubiakmuana'n box pawn aṭangin si phurh sutna goal a pet lut.

Inkhel a nung ṭha a, mualneitu Project Veng an ṭha hret. Minute 83-naah Kolasib club-in Venghnuai tlarhnung an ṭhiat a, Samson-a cross chu Lalfamkima'n chakna goal khung nan an hmang. Kawr sen nena Kolasib club ṭawiawmtu mipuite thawm a ṭha a, Project Vengin point thum hlu tak an hlawh chhuak.