Team hlawhtlinna a pawimawh ber - Lianzuala
Pathianni zan hian Mumbai City chuan tun season ISL-a an match hmasa ber an khel dawn a, Pathianni zan dar 8:00 hian khualmualah NorthEast United an lenchilh dawn - season hmasa ISL hero of the league Lianzuala chuan mimal hlawhtlinna aia team a ngaih pawimawh zawk thu Vanglaini a hrilh.
Lianzuala chuan, "Season harsa tak a ni dawn tih ka hria - a pawimawh ber erawh mimal anga hlawhtlinna chan a ni lo a, team anga hlawhtlin hi ka dah pawimawh hmasa zawk a ni," tiin Vanglaini a hrilh a, mimal hmingṭhatna chu a dah hnuhnun zawk thu a sawi.
Mumbai City forward hian season hmasa khan match 22-ah goal 10 khungin, assist vawi ruk a nei a, ISL hero of the league-ah thlan a ni. Sunil Chhetri tih loha Indian player zinga he lawmman dawng thei hmasa a ni.
Lianzuala hi Indian player zinga ISL-a goal khung tam pahnihna a ni bawk a, ISL-ah match 119 khelin goal 30 a khung tawh. Indian player zinga a phak loh awmchhun hi Sunil Chhetri niin, India captain hian match 135-ah goal 56 a khung tawh thung.
Mumbai City hian Lianzuala bakah Lalengmawia Ralte (Apuia) leh defender Hmingthanmawia Ralte (Valpuia) an kawl a, an lenchilh tur Highlander hian forward Rochharzela leh midfielder Fredy Chawngthansanga an kawl thung.
Fredy hi Bengaluru youth system chhuak niin, tun nipui transfer-ah Highlander hi a zawm - NorthEast United hian Bengaluru assistant coach hlui Naushad Moosa leh CEO hlui Mandar Tamhane an kawl a, Bangalore club lama amah lo hrechiang tawhtuten Fredy an la lut. Aizawl FC forward hlui Chhara erawh Highlander-a awm sa a ni thung.
Vawiin tlai dar 5:30-ah Odisha-in Chennaiyin an mikhual dawn a, Chennai club-in Mizo player an neih loh laiin Odisha-ah erawh player pakua an awm thung - goalkeeper Lalthuammawia Ralte, defender Jerry Lalrinzuala, Laldinliana Renthlei, Lalliansanga Renthlei, midfielder Isaac Vanmalsawma, Isak Vanlalruatfela, K. Lalṭhathanga (Puitea), Paul Ramfangzauva leh forward Jerry Mawihmingthanga an kawl.
Chanmari tlangval Jerry Mawia hian ISL-ah match 102 khel tawhin, assist 18 a nei a - Indian player zinga ISL-a assist nei hnem pahnihna a ni mek. Jerry chungah hian Brandon Fernandes a awm a, FC Goa attacking midfielder hian match 91-ah assist vawi 22 a nei.
Inrinni zan dar 8:30-ah kai thar Punjab FC chuan Mohun Bagan an lenchilh dawn - Punjab-ah hian forward Brandon VL Remdika leh striker Daniel Lalhlimpuia te an awm a, Bagan hian midfielder Lalrinliana Hnamte (Terina) an kawl thung.
ISL-ah Blasters-in chakin bul an ṭan
India rama footbal inelna sang ber Indian Super League chu September 21, Ningani zan khan khelh ṭan a ni a, Kerala Blasters-in an mual Jawaharlal Nehru Stadium, Kochi-ah Bengaluru 2-1 in an hneh.
ISL hi season 10-na a ni a, India-in Asian Games an khelh dawn avangin Bengaluru-in captain Sunil Chhetri an chhawr thei lo. Team pahnih bul ṭantu zingah Mizo an tel lo a, bench-ah Mizo tlangval pakhat ve ve an awm thung.
Kerala mipuiten football an ngaina tih a lang a,entu an ṭhahnem a, inkhel a nung bawk. Minute 52-naah corner kick hmang ṭangkaiin mualneituin goal an khung a, Bengaluru midfielder Keziah Veendorp-a'n an lamah a tilut.
Bengaluru an chesual chhunzawm a, goalkeeper Gurpreet Singh Sandhu-a'n ball a lak per hret avangin Basters captain Adrian Luna a rawn inrawlh hman. Uruguayan forward Luna hian minute 69-naah goal ruakah a khung.
Kerala-in Kanan tlangval Freddy Lallawmawma an luhtir a, Santosh Trophy-a Karanataka champion puitu Lalremtluanga Fanai erawh Bengaluru lamin khelhna hun an pe lo.
Bengaluru-in captain Chhetri awm loh an tuar a, chutihrualin Middlesbrough tan pawh khel Curtis Main-a'n ISL a khelh hmasak berah goal a khung. Kerala-in goal dang an chhuah tawh lo a, 2-1 in an chak.