City-in player panga inhliam an nei

Manchester City-in zanin dar 7:30 hian Nottingham Forest an hmachhawn dawn a, Pep Guardiola hote hian inhliam vangin player panga an chhawr thei lo ang.

City player inhliamte hi Kevin de Bruyne, Bernardo Silva, Jack Grealish, Mateo Kovacic leh John Stones te an ni a, player pawimawh vek an ni. Pep chuan, "Player pawimawh panga an inhliam a, a harsa dawn. Mahse a nihna ang hi kan pawm mai a ṭul," tiin a sawi.

Man City hian UCL match hmasa berah Red Star Belgrade an hneh a, Community Shield-a Arsenal an hneh loh hnuah an chak vek. Pep-a hoten goal khung an harsat lo a, KDB awm lo mah se Erling Haaland thlawptu Julian Alvarez-a'n goal a khung bakah a ṭhiante khung tur a siamsak.

Argentine forward Alvarez hian goal li khung tawhin assist vawi thum a nei der tawh. Alvarez chuan, "Club-in ka chungah rinna an nghat a, thungrulh tumin theihtawp ka chhuah," tiin a sawi. Forest lakah pawh Alvarez leh Haaland te inkawp bawk hi an hlauhawm ang.