Red Bull ringtu Hamilton

Pathianni chawhma dar 10:30 hian Formual 1 Japanese Grand Prix tlan a ni dawn a, vawi sarih champion tawh Lewis Hamilton chuan seaon hmang ṭha tak Red Bull bawkin hnehna an chan leh a rin thu a sawi.

Intlansiak hnuhnung ber Singapore GP-ah Ferrari team an chak a, tun season inelna an neih tawh china Red Bull pakhatna an nih loh ṭum khatna a ni hial, tun ṭuma an inelna tur hi Asia khawmualpui tho a nih avangin Max Verstappen leh Segio Perez te an chak zo ang em tih chu zawhna a ni mek.

Mercedes car khalhtu Hamilton chuan, "A nihna takah chuan season tir lamah kha chuan midang aiin second 30 vel laiin an tlan chak thei, tunah erawh an falna hi a tlahniam ve deuh ta zel a, tun ṭumah pawh hi an fal lutuk lo ang, mahse an chak erawh a rinawm," a ti.

Hetihlai hian driver championship hmahruaitu Max Verstappen erawh a ṭawng fimkhur hle a, an elpui chu team pakhat chauh ni loin team inelna an tam tih a sawi a, tun inelna an hmachhawn tur atan chuan McLaren chu an hlauhawm thei tih a sawi bawk.