United an insiamṭha thei dawn em?

Manchester United a zawnin match thum chhung an chak lo a, zanin dar 12:30 hian Turf Moor-ah Burnley an tlawh dawn. Erik Ten Hag-a hoten season bul an ṭan ṭhat loh avangin pressure an nei a, an harsatna belhchhah turin player inhliam an ngah bawk.

Brighton laka an mualpho ṭumin Aaron Wan-Bissaka a inhliam a; Amad, Tyrell Malacia leh Luke Shaw te pawh hliam vangin chhawr theih an la ni lo. Khelmual pawna buaina tawk Antony leh Jadon Sancho ten Clarets an la hmachhawn thei dawn lo bawk.

Loan hmanga lakluh Sofyan Amrabat leh rawlthar duhawm Kobbie Mainoo ten training an zawm tawh a, Bayern hneh lo squad-ah Mason Mount leh Raphael Varane te tel lo mah se player tawnhriat nei ṭha pahnih hian Thawhlehni aṭangin team training an zawm tawh bawk.

Man United-in inrintawkna nei kir turin point thum an mamawh a, Burnley hi insiamṭhatna hun ṭha a ni. Vincent Kompany kaihhruai Clarets hian season an ṭan ṭha bik lo a, league match hmasa pathumah Man City, Aston Villa leh Spurs te an hneh lo. Match hnuhnung berah a vawi khat nan point hlawh chhuakin Forest nen 1-1 in an inhnehtawk.

Table-ah Burnley hi 19-naah an awm mek a, Man United tan point thum hmuhna remchangah a ngaih theih. Bayern lakah striker thar Rasmus Hojlund-a'n goal a khung a, Premier League lamah pawh Danish striker hian a khung thuai a rinawm.