Captain ni khan min barakhaih - Gallagher

Conor Gallagher chuan Chelsea leh Bournemouth inkhelh ṭuma captain armband a hreng ve mai chu mak a tih thu a sawi chhuak a, chutihrualin hman aṭanga a lo suangtuah tawh ṭhin a nih thu a sawi bawk.

English midfielder Gallagher hi Chelsea aṭanga inzir chhuak a ni a, intuaihriam turin Charlton, Swansea, West Brom leh Crystal Palace lamah te a kal tawh ṭhin a, tunah chuan Mauricio Pochettino kaihhruaina hnuaiah hmun nghet chan tumin a bei mek a ni.

Kum 23 mi Gallagher chuan, "A tira ka duhthusam chu Chelsea tana khelh phak a ni, hemi rual chiah hian player dangte ang bawkin captain nih chu ka chak ve bawk, khatianga ka hun a rawn herchhuak ve mai kha mak pawh ka ti hle.

"Under 18 team tan chuan captain pawh ka lo ni ve tawh ṭhin, mahse senior team tan chuan a danglam," a ti. Gallagher hi captain nghet erawh a ni lo, captain pangngai Reece James chu hliam vangin a chawl mek a, a karlakah armband a lo hreng ve tihna a ni.

Chelsea hian Pathianni zan dar 6:30-ah Aston Villa an mikhual dawn, season an hman ṭhat loh tak aṭang harhchhuah theihna hun ṭha a ni ang. Villa hi European football khel chau an nih avangin Blues tan remchang a ṭha zual dawn niin a lang.