Bellingham tan Madrid derby hmasa ber

September 24, Pathianni zan dar 12:30 hian La Liga-ah Madrid Derby hmuh tur a awm dawn a, Civitas Metropolitan Stadium-ah Atletico Madrid-in Real Madrid an mikhual ang. English midfielder duhawm Jude Bellingham tan Madrid Derby a hmachhawn hmasak ber tur a ni ang.

Madrid Derby

Kum 1902 khan Real Madrid hi din a ni a, a hnu kum khatah Atletico Madrid hi din veleh niin official match-a an inhmachhawn hmain vawi eng emaw zat an inhmachhawn hman. Club pahnih intawn hmasak ber chu December 2, 1906 kha niin Campeonato Regional Centro-ah 1-1 in an inhnehtawk.

Kum 1928-29 season aṭangin La Liga khelh ṭan a ni a, Real leh Atletico te hi a dintu zinga mi an ni. La Liga bika an inhmachhawn hmasak ber chu February 24, 1929-ah niin Real Madrid-in an mual Chamartín stadium-ah 2-1 in hnehna an chang.

Club inhal tak ni mah se tuna club pahnih inkarah hian inhriatthiam tawnna a tel. 1963-64 season khan Real-in Atletico an relegate loh nan forward Ramon Grosso chu loan hmangin an hawhtir. Mexico forward Hugo Sanchez pawhin derby-ah club pahnih tan goal a khung ve ve.

Tun hnu thleng pawhin club pahnih tana khel kawp an awm nual. Real Madrid keeper Thibaut Courtois hi Atletico Madrid-a bul ṭan a ni a, tuna Diego Simeone squad-a mi Marcos Llorente, Alvaro Morata, Mario Hermoso leh Saul Niguez te hi tun hmain Real Madrid tan an khel tawh bawk.

Hei vang hian Madrid Derby hi friendly match ang chauh a ni tihna a ni lo a, La Liga inkhel dang ai pawhin a boruak a ṭang zawk. Derby match ang thoin a boruak a sang ṭhin.

Bellingham-a hun

Tun ṭum Madrid Derby-a mipui mit fukna ber chu Jude Bellingham a ni a, nipui bazara Santiago Bernabeu pantu English midfielder hian season ṭha tak a hmang. Bellingham hian Madrid tana match ruk a khelh aṭangin goal ruk a khung tawh a, goal satliah ni loin chakna goal te a ni hlawm

Champions League-ah Real Madrid hian Union Berlin 1-0 in an hneh a, Bellingham hian injury time-ah chakna goal a khung. La Liga lamah pawh match hmasa paliah goal a khung vek. Atletico tlarhnung tan pawh Bellingham hi ven uluk a ṭul dawn. Inkhelhna hmun tur hi Cívitas Metropolitano a ni dawn a, khualmualah Bellingham fiahin a awm dawn.

Atletico hian tlarhmaah Alvaro Morata, Antoine Griezmann leh Memphis Depay te an nei a, hming langsar tak vek an ni. Bellingham an thlir ṭhup karah hian tawnhriat nei player Morata, Griezmann leh Depay te an rawn langsar thei bawk.