Result a fair lo - Brighton boss

Manchester United hnehtu Brighton & Hove Albion chuan European football an khelh hmasak berah AEK Athens an mikhual a, anmahni mualah 3-2 in an tlawm. Europa League group B-ah Brighton hi Athens bakah Ajax leh Marseille te nen an awm ho a, hmabak a harsa dawn hle.

Brighton hian corner kick leh freekick aṭangin goal an chhuah a, Joao Pedro-a'n a penalty hlawh ve ve aṭanga ṭum hnih khungin siphurh a sut. Mahse, Pedro hian keeper chauh a hmachhawn hnuah hattrick siamna leh chakna goal a khung thei lo.

English club hian ball chang tam mah se Athens-in Ezequiel Ponce hmangin minute 84-naah chakna goal an khung. Brighton an chak zo lo a, inkhelh banah manager Roberto de Zerbi-a'n an vanduai thu a sawi.

De Zerbi chuan, "Athens-in counter attack leh set piece aṭangin goal an khung tih kan hre sa a, chuta ṭang chuan goal kan chhuah. Kan fimkhur tawk lo a ni. Chutihrualin ka naute an khel ṭha a, inkhel an thunun a, kan khelh dan thlirin chak lo tur kan ni lo. Result a fair lo," tiin a sawi.

Ajax leh Marseille te 3-3 in an inhnehtawk a, French club tana Pierre-Emerick Aubameyang-a'n goal hnih a khung. Inkhel dangah Jose Mourinho enkawl Roma-in khualmualah Sheriff an hneh a, Bundesliga hmahruaitu Bayer Leverkusen-in Hacken 4-0 in an sawp bawk.