Bayern-in Muller an la mamawh em?

Bayern Munich an lam rik ruala player hming lo lang nghal chu Thomas Muller a ni a, German forward hi kum 34 mi ni tawhin tun season-ah khelh tluan a la nei lo. Bavarians-in Champions League-a Manchester United an hneh ṭum khan Muller hi bench aṭangin a lut a, eng ang chiahin nge a pawimawh zel dawn tih chu hunin a hril ang.

Bayern hian zanin dar 7:00 hian Bochum an mikhual dawn a, Thomas Tuchel-a'n Muller hi bul a ṭantir mai a rinawm. Chutihrualin Muller-a'n inkhel bul a ṭan dawn a nih chuan Man United laka khel ṭha zet Jamal Musiala chu bench-ah a awm a ngai thung dawn.

Bavarians-ah hian Muller-a chhawr duh lo manager chu an ban ṭhin an ti fiamthu ṭhin a, manager luh chhuah dan thlir chuan a dikna chen pawh a awm. Tuchel pawh hi season liam ta tawp lam a chet ṭhat tawk loh avangin Allianz Arena-ah a hian dinhmun a nghet tawk lo.

Chutihrualin Tuchel hian Muller hi chhawr lo pawh ni se dem theih a ni lo a, mahse Bavarians ṭantu ruhkawl zingah pawm thiam lo an awm thung ang. German player an duh ang thur thei Bayern-in kum 2009-a Mesut Ozil an lak loh chhan kha Muller hi a ni a, kum 14 hnuah pawh Muller hi Bayern player langsar a la ni.