Champions League Quarterfinal Maktaduai 200 man Neymar chet a hun

Footballer manto ber Neymar awmna Paris Saint-Germain chuan zanin dar 12:30 hian Champions League quarterfinal khel turin Atalanta an hmachhawn dawn a, pound maktaduai 200 senga an lakluh Neymar tan a thiam thil 'show' hun a ni ang.

Coronavirus vangin inelna kalphung tih danglam a ni a, zaninah semifinal lut tur zawk chinfel nghal a ni dawn - mahni mual leh khualmuala khelh tawn ang khan a ni lo. Portugal khawpui Lisbon-a khelmual hmingthang Estadio da Luz-ah a hmuna entu awm loin khelh tur a ni.

French champion PSG leh Atalanta te hi tun hmain an la intawng ngai lo, sulhnu ṭha hnutchhiahtu zawk nih an tum dawn. Champions League nomawi la chawi ngai lo ve ve an ni bawk a, boruak delh rittu nei loin nuamti takin an khel thei ang.

Brazil leh PSG tan hliam vangin match pawimawh khelh theih loh a nei fo a, tunah erawh Neymar a dam ṭha tawk - rawlthar Kylian Mbappe chu hliam vanga a dinhmun a chian loh avangin Barcelona star hlui lakah mawhphurhna a sang zual dawn.

Catalan club aṭanga Ligue 1 champion a pan hnuah Neymar hian season hnih chu Champions League a khel tawh, mahse hliam vangin Real Madrid a hmachhawn thei lo a, a hnu kum lehah Manchester United an khelh dawnin a hliam leh bawk.

Atalanta hmachhawn tur erawhin buaina a nei lo, kum 28 mi hian a vanglai a hmang mek. Ligue 1, French Cup leh League Cup chawipui tawh mah se heng inelna te hi chu season dangah pawh an chawi thei, an duh chu Champions League a ni.

Entu awm loa UCL match khelh hi Paris club tan thil thar a ni tawh lo, last 16 second leg-a Borussia Dortmund an hneh ṭum khan entu nei loin an khel; Neymar hian goal hmahruai khungin 2-0 in hnehna an chang, zaninah pawh Paris khawpui tan hlimna thlen leh a tum ang.

Ke rek hliam Mbappe-a'n training zawm leh tawh mah se minute 90 chhung a inkhelh theih a la rinawm loh a, striker Mauro Icardi leh winger tlan chak Angel di Maria te an la neih bawk vang erawh chuan Italian tlarhnung ṭhiat turin an la ṭha tawk viau.

Season hmasa khan Atalanta hi Seria A-ah goal khung hnem ber (77 goals) niin table-ah pathumna an ni a - Champions League an khel. UCL an khelh hmasak berah hian quarterfinal an thleng nghal a, an tihfuh palh vang ngawta khel satliah chu an ni lo.

Gian Piero Gasperini-a enkawl team hi kuminah pawh an hmuhnawm a, pathumna dinhmun bawk luah lehin goal khung tam ber (98) an ni leh bawk. French champion tan tlarhnung rem phui ṭhat a ngai dawn tih a chiang hle.

Atalanta hian chhungrilah buaina an nei! Striker chhuanvawr Josip Ilicic chu mimal thil vangin an ram Slovenia-ah a haw, league match hnuhnung lamah pawh a inlan thei lo - UCL lamah pawh an chhawr thei dawn lo nia sawi a ni. Season kal laia goal 21 khung thei awm lo tur hi channa lian tak a ni ang.

Gasperini chuan, "Paris nen Lisbon-a kan intawn hun tur a hnai zel a, chutihrualin player pawimawh Ilicic chu dinhmun chiri takah a awm thung, ani hi awm ve thei se chu duhthusam a ni," a ti. Ilicic buaina hi chiang taka tarlan a ni lo a, media ṭhenkhat chuan a nupui a uire niin an ziak.

Ilicic a awm lo a nih pawhin Serie A goal 18 khung thei pahnih Luis Muriel leh Duvan Zapata te an la neih avangin tlarhma lam chu an ngaihtuahawm lo, chutihrualin tlang tur chuan goal khung ringawt a tawk dawn lo a, tlarhnung remphui a pawimawh ang.