Goal nga khung Liverpool an chak hram!
Inrinni zan Premier League inkhelah Liverpool-in Norwich City an lenchilh a, goal kua ngawt a lut. Reds-in goal nga an khung a, Norwich City-in goal li an khung thung.
Team pahnihin goal khung an uar tluk zetin goal chhuah lam pawh an uar a, mikhual khelmualah Liverpool-in 5-4 in hnehna an chang.
Goal a sur!
Inkhel ṭan aṭanga minute 18-na lekah Reds-in Roberto Firmino hmangin goal an khung nghal a, an lo tlangnel fo tawhna khelmualah awlsam takin Liverpool an chak dawn niin a lang.
Mahse, Norwich-in mual-neitu an ni tih khelmual chhung-ah lantirin goal thumin an chhanglet nghal. Dieumerci Mbokani-a'n an si phurh sutna goal a khung hnuah Steven Naismith chuan Norwich tana a match hmasa berah goal a khung a, penalty
aṭangin Wes Hoolan chuan an goal thumna a khung bawk.
Liverpool-in Jordan Hen-der-son, Firmino leh James Milner hmangin goal an khung ve leh a, minute 90-na a Reds hmahruaina chu 4-3 niin minute nga hun pek belh an ni. Mualneitu team-in minute 92-naah Sebastien Bassong hmangin an si phurh an sut a, Liverpool player an hawihai a, Norwich-in point an hlawh chhuak dawn emaw an ti hman.
Mahse, minute 95-naah Reds tan Adam Lallana-a inlar a, English midfielder hian Liverpool goal ngana a volley goal. Field pawnah kawr phelhin a tlan chhuak a, a sirah lawm avanga Reds manager Jurgen Klopp tlankual hmuh hmaih theih a ni lo. Minute 95 hnuah Liverpool-in 5-4 in hnehna an chang.
Manager thukhawchang
Liverpool manager Klopp chuan, "Minute 70 vel chu ṭha takin kan khelin ka hria. Inkhel pumpui thlirin goal li chhuah hi chu a ṭha lo hrim hrim a, set-piece aṭanga kan goal chhuah phei kha chu nuihzatthlak mai a ni. A tawpah erawh kan chak ta tho e," tiin vannei taka an chak thu a sawi.
German manager chuan, "Goal khung tura chance siam kan thiam em em a, keimahni tana kan siam loh pawn kan khingpuite tan kan siamsak zel a ni," tiin fiamthu a thawh zui.
Norwich City boss Alex Neil chuan, "Goal nga kan chhuah a nih chuan chak kan phu lo tihna a ni. 3-1 a hma kan hruai khan kan kutah inkhel kha a awm tawh a, mahse chu chu thlauh thlain point thum kan hloh a ni," tiin chak thei dinhmuna an din thu a sawi.
Siam thar ngai Reds
Eng team pawh ni se Pre-mier League-a khel pha chin laka goal nga khung hi a ropui a, chumi tluk zeta zahthlak erawh goal li lai club lian nia inngaiin team tenau laka chhuah hi a ni.
Reds-in goal khung an harsat viau hnuah goal an khung nual a, an tlarhnung a pherh leh si. Norwich si phurh sutna goal hi corner aṭanga lut a ni a, Reds defender-te'n a pet chhuah theih loh chu mawi takin Mbokani'n a kheng lut. Liverpool-in tun season-ah corner aṭangin goal riat an chhuah tawh - Premier League-ah anni aia corner aṭanga goal chhuah hnem an la awm lo.
Liverpool hian tun hnaiah an goal khung harsatna sukiang turin Shakhtar Donetsk forward Alex Teixeira lei tumin Ukrai-nian club an dawr mek a, In-rinni zana an khelh dan ngaih-tuah chuan an tlarhnung tiphui tur player pawh an zawn a ngai dawn niin a lang.