India an chak ve ta

ODI series match li chhung chak hmel an hmuh loh hnuah India-in chak hmel an hmu ve ta a, an mualpho lutuk tur thup nan Inrinni khan Australia chu wicket rukin an hneh. Mualneitu Australia hian 4-1 in ODI series hi an la.

Sydney Cricket Ground (SCG), Sydney-a inkhelah Australia an bat hmasa zawk a, over 50-ah run 330 zet vaw chhuakin mi pasarih an hloh a, India tan target huphurhawm tak an tuk sak.

Australia tan run 122 vaw chhuaktu Aaron Finch leh run 102 siamtu Mitchell Marsh-te an che ṭha a, an dan pangngaiin Indian bowler-te an mualpho.

India bat hun a thleng a, Indian batsman-te'n chak result nei loa haw an tum lo tih khelmual chhungah an lantir a, over 49.4-ah run 331 vaw chhuakin mi pali chiah hlohin an khel ṭha hle.

India tan a dan pang-ngaiin Rohit Sharma-a che ṭha a, Man of the Series-a an thlan batsman hian run 99 a vaw chhuak. India tan ball 56 a hmachhawna run 78 vaw chhuaktu Shikhar Dhawan leh ball 81-a run 104 vaw chhuaktu Manish Pandey-te an khel ṭha hle bawk.

Run khata century siam tling ta lo Rohit Sharma hian ODI-ah run 5000 chuang a siam ta a, Indian cricketer zinga ODi run 5000 chuang siam thei 12-na a ni. Kum 28-a upa batsman hian ODI match 142-a inlanah run 5008 a siam a, heti zat run siam tur hian century vawi sawm a vuak chhuah bakah half century vawi 28 a vaw chhuak a ni.