British nula pahnih chak lo

Thla nga chuang an chawlh lailawk hnuah tennis an khel chhunzawm leh thei tawh a, Lexington Open pawh khelh mek a ni. Hard court inelnaah hian Britain nula pahnih Johanna Konta leh Heather Watson te inlanin an chak lo nghal ve ve.

Thawhṭanni zan inkhelah seeded pathumna Konta hi world number 48 Marie Bouzkova lakah 6-4, 6-4 in a chak lo. Inkhel tir lamah Konta hi damlohna vangin enkawl a ngai a, khel chhunzawm thei mah se a beisei ang result a nei phak ta lo.

Hripui len hma khan Mexico-ah player pahnih hi an lo intawng tawh bawk, an inkhelh hnuhnung berah pawh hian Czech Republic nula zawkin hnehna a chang - coronavirus vanga an chawlh hnuah intawng zui leh nghalin a chungnung nawn leh ta chiah a ni.

Inkhel dangah Watson chu American player Jennifer Brady lakah 6-2, 6-1 in a chak lo ve thung. Hripui vangin kuminah grass court season an hmang thei dawn lo a, Britain player-te hian inkhelh nuam an tihna berah match an nei thei dawn lo.