Serena leh Sharapova an inhmachhawn dawn

Champion lai Serena Williams leh Maria Sharapova te chuan nimin khan Australian Open last 16 an paltlang ve ve. Player ṭha pahnihte hi nikum khan final-ah an lo inhmachhawn tawh a, kuminah erawh quarterfinal-ah an intawng dawn ta a ni.

Rod Laver Arena, Melbourne Park-a seeded pakhatna Serena hian Margarita Gasparyan chu minute 55 chhung lekin 6-2, 6-1 in a hneh.

Kum 34-a upa Serena hian Garnd Slam champion vawi 22 ni thei turin chak takin hmalam a pan zel a, Australian Open title a vawi sarih nan lak a tum hle bawk.

American tennis player Serena chuan, "Inkhelh lehpekah tu nge ka hmachhawn dawn tih lam ka ngaihtuah ngai lo a, ka inkhelh laiah chauh ka rilru ka pe mai ṭhin. Tunah chuan tu pawh hmachawn dawn ila ka khelh ṭhat lai a nih avangin ka inpeih," tiin a sawi.

Last 16 inkhel dangah Rus-sian star seeded pangana Sharapova chuan khel ṭha vak lo mah se Belinda Bencic lakah 7-5, 7-5 in hnehna a chang hram a ni.

Kum 2008 Australian Open champion Sharapova hian Bencic lakah hian vawi 21 ngawt ace siam thei mah se double fault vawi sarih a neih bakah vawi 46 ngawt unforced error a nei bawk.

Kum 28-a upa Sharapova chuan quarterfinal thlirlawkin ,"Nikum khan final ropui takin kan lo khel tawh a, kuminah chuan quarterfinal-ah kan inhmachhawn dawn. Khawvela ṭha ber nen kan inhmachhawn dawn avngin inkhel hmuhnawm tak a ni ang," a ti.

Tunlai khawvela hmeichhe tennis player langsar ber berte zinga mi te hi tun hmain vawi 20 an lo inhmachhawn tawh a, Serena hian vawi 18 hnehna chang tawhin a chungnung zawk hle.

Sharapova hian an intawn hnuhnung parukah set khat mah a la lo a, Williams laka hnehna a chan hnuhnung ber chu kum 2004-a Los Angeles a neih Tour Championships-ah khan a ni.

Inrinni khan world number 1 pawh lo ni tawh Ana Ivanovic chu Madison Keys lakah 4-6, 6-4, 6-4 a tlawmin third round a paltlang zo lo.

Seeded 20-na Ivanovic leh seeded 15-na Keys te hi an inbei tawk hle a, darkar hnih leh minute ruk chhung ngawt an inkhel a ni. Anni pahnih inkhelh lai hian Ivanovic-i coach Nigel Sears chu a tluk avangin damdawi-in hnai berah hruai a ngai a, hei vang hian darkar khat dawn inkhel an chawl lailawk a ni.