Kolkata Derby-ah chak zawk awm lo

Inrinni tlai Kolkata Derby hmuhnawm takah Mohun Bagan leh East Bengal te 1-1 in an inhnehtawk.

Salt Lake Stadium-ah entu 62,342 zet an pungkhawm a, chak tura rinkai chu Mohun Bagan an ni. First half-a goal a luh loh hnuin second half minute 63-naah Bikash Jairu ball vawrh luh chu Ranti Martins-a'n chiang zetin a volley lut.

Mohun Bagan-in siphurh sut tumin minute 72-naah Jeje Lalpekhlua an luh tir a, goal khungtu erawh Shillong Lajong aṭanga an lakluh Cornell Glen a ni. Minute 77-naa Sony Norde freekick chu Trinidadian forward Glen-a'n a tauh goal nalh hle.

Inkhel chhehvel

East Bengal-ah mizo pathum S. Mal-sawm-tluanga, Robert Lal-thlamuana leh Lalrindika te an awm a, Didika hi inhliam vangin a inlan thei lo. Captain armband hreng tura beisei Robert a inlan lo a, minute 85-naah Mama a inlan bawk.

Red and gold brigade hi Calcutta Football Lea-gue champion niin nomawi chawi kawngah Mohun Bagan 4-0 in hneh mah se an intawn hnuhnun ber ṭum hian Mariners an kim lo. Tun ṭumah hian Bagan-in an player ISL-a khelte leh foreigner ṭhate an chhawr theih tawh avangin Jeje te khelhna hi chak zawk tura rin an ni.

Amaherawhchu East Bengal tan South Korea striker Dong-Hyun Do leh Ranti te an khel ṭha a, minute 90 chhunga vannei zawk chu Bagan an ni.

Eng nge an sawi?

East Bengal mid-fielder Mama chuan, "Team ṭha tak lakah point khat kan hlawh chhuak a, lungawi lohna tur a awm lo. Mohun Bagan kha tu pawhin chak tur zawkah an ngai a, chak lo teuh zawk an nih avangin an hotute an thinrim zawk ang," tiin an result-a an lungawi awi thu Vanglaini palai a hrilh.

Bagan forward Jeje pawhin Vanglaini palai hrilhin, "Chak chu kan duh vek a, point khatah pawh kan lungawi tho. Vawi thum khelhah chak lo kan la nei lo a, season bul kan ṭan ṭha thaw khatah ka ngai," a ti.