Leicester an chak; Spurs-in hmalam an pan zel

Season ṭan tirah beisei phak bakin Leicester an che ṭha a, season tawp lamah erawh team tenau an nih miau avangin zuih ral tura ngaih an ni.

Mahse, Inrinni zana an inkhelh danah erawh Foxes-in thamral tur zia an pu lo a, an mikhual Stoke City chu 3-0 in an sawp. Inrinni zan inkhel dangah Tottenham Hotspur chuan 3-1 in Crystal Palace an hneh bawk a, Champions League an beisei chhunzawm zel.

Foxes tan Vardy

Leicester-in Stoke City an mikhual hmaa an league match hnuhnungah vawi khat chiah chak hmel an hmu a, FA Cup third round aṭanga hnawhchhuah an nih bawk avangin team tenau zia an chhuah ṭan nia ngaih a ni.

Mahse, Leicester-in season ṭan tir lama an khelh dan angin an khel a, an khelmualah team pangngai ve tak Stoke an ngam hle. Foxes tan Danny Drinkwater-a'n goal hmahruai a khung hnuah Jamie Vardy-a'n Jack Butland tlan pelin goal a khung a, Leonardo Ulloa chuan an goal thumna a khung bawk.

Vardy-a tan darkar sawm leh minute 17 Premier League goal a khung loh hnua a goal hmasa ber a ni a, tun season-a a goal 15-na chiah a ni.

Ranieri thukhawchang

Leicester City boss Claudio Ranieri chuan, "Tumahin tun dinhmun hi kan thlen an ring lo. Mang ramah kan fan-te chu an cheng mek a, ṭhangharh miah lo se tih hi ka duhthusam a ni. Premier League nomawi chawi tur zinga chhiar tel kan ni em ka hre lo a, February thla hi ral phawt se kan la sawi leh ang chu," a ti.

Leicester hian February thla chhung-in league match-ah Liverpool, Man--ches-ter City leh Arsenal a zawnin an hmachhawn dawn a, huaisen taka Ranieri a ṭawng ngam lo hi a dem awm loh.

Spurs an chak

Tottenham pawhin an hnuai chiaha awm Manchester United chak loh zanah Premier League table-a palina dinhmun an sawh nghet zel a, khualmualah an Champions League beiseina tinung turin Crystal Palace chu 3-1 in an hneh.

Spurs defender Jan Vertonghen-a'n an lamah ti lut mah se Tottenham tan Harry Kane, Dele Alli leh Nacer Chadli ten goal an khung a, Selhurst Park-a inkhelah chak phu zawk an chak.

Sawi zui hlawh Alli

Inkhelh zawha sawi hlawh ber chu kum 19-a upa Alli goal khung a ni. English midfielder hian mawi taka Mile Jedinak a vir kual khum hnuah yard 25 vela hla aṭangin a volley a, Palace keeper Wayne Hennessey-a tan tih theih a awm lo.

Tottenham boss Mauricio Pochettino chuan, "Dele Alli goal kha goal ropui bik a ni a, player thiam tak a nihzia a pholang a ni. Kha goal kha khawvel hmun hrang hrangah an ennawn fo ang," tiin Alli goal chu a fak.

Spurs striker Harry Kane chuan, "Khatiang goal kha ka la khung ngai lo a, khatianga goal ropui kha ka hmuh lohna a rei ta hle bawk," tiin a ṭhianpa goal khung chu ropui a tih thu a sawi. Harry Kane hian Premier League-a a match hnuhnung 14-ah goal 12 a khung leh tawh.

Crystal Palace manager Alan Pardew chuan, "En pawh a nuam lo zawk tih mai loh chuan sawi ngaihna ka hre lo. Alli khan mawi taka ball a vir kual pui lai khan ka lo hlauthawng daih tawh. Player thiam bik a ni," tiin an khingpui player a fak.

Pochettino thukhawchang

Tottenham manager Pochettino chuan, "First half-a kan khelh danah lawm lo mah ila second half-ah kan theihna tak tak kan pholangin ka hria. Premier League-a squad naupang ber kan nei a, mahse ka naute khelh dan en chuan Premier League-a squad upa ber khelhin kan khel a, kan khel a puitling em em a ni," tiin a naute a fak.