Barcelona chakna Messi bawk

Inrinni zan khan Barcelona chuan La Liga match khel turin Malaga an lenchilh a, 2-1 a hnehna changin an chakna goal khungtu chu hliam damkawr Lionel Messi a ni.

Malaga khelmualah Barcelona-in goal an khung hma a, inkhel ṭan aṭanga second 20-na lekah rawlthar duhawm Munir El Haddadi chuan Catalan club tan a khung.

Mahse, Barcelona tlarhnung pherh chhawr ṭangkaiin Juanpi chuan an si phurh sutna goal minute 32-naah a khung a, Venezuelan midfielder hian Malaga tana La Liga-a a goal khung hmasak ber a ni.

Second half-ah Barcelona tan Messi a inlar a, Argentine forward ropui hian minute 52-naah Barca chakna goal a khung. Messi hi kar hmasa Copa Del Rey-a Athletic Bilbao an hneh ṭumin hliam vangin a chawl a, a lo kir lehna inkhelah goal a khung leg nghal.

Barca danglamna Messi

Barcelona-in La Liga-ah hma an hruai a, vawi 20 inkhel an hmachhawn tawhah point 48 hmuin an hnuai chiaha awm Atletico Madrid chuan Barcelona hi point khatin an phak lo. Nizana Atletico result a zirin table erawh danglam leh thei a ni thung.

Kartawpa Atletico nena La Liga hma-hruaitu nih inchuha Madrid khawpuia lenglut tur Barcelona hian hliam vanga inlan thei lo Neymar tel loin an khel a, Brazil captain aia lut El Haddadi chuan goal a khung thung.

Mahse, Barcelona-in goal an chhuah hnuah an talbuai a, an mikhualna ramah an chak lo mai dawn niin a lang hman. Mahse, chawlhlawk hman zawhah first half-a lang mang lo Messi a inlar a, Argentina captain scissors volley ropui hi Malaga keeper Carlos Kameni tan dan theih a ni lo.

Barcelona thiampuipa hian khelmual chhungah chiang taka a tarlan chu - a khelh ṭhat loh lai pawn chakpui tham player a ni tih hi a ni.

Inrinni zan

La Liga Inkhel Results

Malaga 1 - 2 Barcelona

Espanyol 2 - 2 Villarreal

Granada 3 - 2 Getafe

Rayo Vallecano 3 - 0 Celta de Vigo