Bundesliga Bayern an chak leh nghal

German-ah thlasik chawlh an hmang zo a, kar hmasa Zirtawpni zan aṭang khan Bundesliga khelh ṭan leh a ni. Champion lai Bayern Munich chuan Robert Lewandowski goal hnih khung hmangin Hamburg chu 2-1 in an hneh.

Hamburg khelmuala inkhelah goalkeeper Rene Adler-a'n Bayern forward Thomas Muller a tih tluk vangin minute 37-naah penalty a chawi a, Lewandowski chuan goal-ah chan tirin a team hma a hruai pui.

Amaherawhchu, second half ṭan tirah midfeilder Xabi Alonso chuan ball pet chhuah a tumna lamah tisualin anmahni lamah goal a khung palh. Mahse, goal hma-hruai khungtu Lewandowski chuan minute 61-naah Muller-a ball pet chu an chakna goal ni turin a lo dang pial lut leh a ni.

Poland international striker hian tun season-ah league goal 17 a khung tawh. Bundesliga-ah bik chuan goal 18 khung tawh Borussia Dortmund striker Pierre-Emerick Aubameyang chiah a tluk lo mek.

Bayern coach Pep Guardiola chuan, "Thlasik chawlh zawha kan match hmasa berah hnehna kan chang thei hi a lawmawm hle. Player-te an thawkrim a, an tlan tamin goal khung hnem pawh an tum. Mahse a chang chuan goal khung harsat ṭum hi a awm ṭhin. Engpawh nise point thum kan hmuh avangin a lawmawm hle a ni," a ti.

Tun season Bundesliga match 18 khelh tawh aṭangin Bayern hian point 49 hmu tawhin hmahruaitu an nih chhunzawm zel.

Dortmund an kal zel

Borussia Dortmund chuan Bayern Munich nen an inthlauhna an ti zim ve zel. Inrinni zan khan Borussia Monchengladbach khelmualah 3-1 in hnehna an chang.

Germany midfielder Marco Reus chuan first half tawp dawnah he inkhela goal hmahruai a khung a, second half ṭan tirhah Henrik Mkhitaryan chuan an goal hnihna a khung. Monchengladbach tan Raffael-a'n goal khat khung ve mah se Ilkay Gundogan-a'n an goal thumna a khung ve leh avangin khualmualah Thomas Tuchel-a nauten point thum an hlawh chhuak.

Dortmund hian league hmahruaitu Bayern chu point riatin an phak lo mek.

Inkhel dangah Hoffenheim chu an mikhual Bayer Leverkusen nen goal khat ve ve khungin an inhnehtawk a, table-a pathumna dinhmun luahtu Hertha Berlin leh FC Augsburg te inkhel pawh goal awm loin an ṭin bawk.