Ligue 1 Paris St-Germain tan Di Maria a vul

French Ligue 1 cham-pion lai Paris St-Germain chuan tun season-a an khelh ṭhat tluan lai an chhawm nung zel. Inrinni zan khan an mikhual Angers chu 5-1 in an sawp a, league match 22 khelh tawh aṭanga point 60 hlawh chhuakin pahnihna Nice nen an inthlauhna chu point 24 zet a ni ta.

Parc des Princes-a inkhelah PSG tan hian Manchester United player hlui Angel Di Maria chuan goal hnih a khung bakah Zlatan Ibramhimovic, Lucas Moura leh Van der Wiel te chuan goal khat ṭheuh an khung bawk.

Laurent Blanc a naute hian tun season league match-ah point ruk chiah an la hloh a, Champions League-ah pawh last 16 in pet kai tawhin thla leh hian Premier League champion lai Chelsea nen an inhmachhawn dawn a ni.