Tlai dar 2:00-ah goal khung hmanga eizawng Odafa inlar dawn Aizawl FC Vs Sporting Clube de Goa

Rajiv Gandhi Stadium, Mualpuiah Odafe Onyeka Okolie inkhel a hmuh theih dawn. I League-a goal 155 zet khung tawh Nigerian striker hi Mizo mipui ṭanpuina nen Mizo tlangvalten dan an tum ang.

Vawiin hian Aizawl FC-in Sporting Clube de Goa an hmachhawn dawn a, inkhelh hun hi tlai dar 2:00 a ni. Spanish coach Manuel Retamero kaihhruai Aizawl FC hian an match hnuhnung berah DSK Shivajians 2-0 in an hneh a, Goan club-in an match hnuhnung berah Pune khaw club DSK hi an mual Fatorda Stadium-ah goal awm loin an draw thung. Sporting Goa-in Mizo player an kawl lo a, foreigner an neih ṭhatna leh I League-a tawnhriat an ngahna chu khawtual club Aizawl FC nena an danglamna a ni.

Thlirtu nge ṭantu?

Aizawl FC-in RG Stadium-ah Benga-luru leh DSK an hmachhawn tawh a, ticket man to chung pawhin inkhel entu an
ṭhahnem hle. Amaherawhchu Mizo mipui pungkhawmin theihtawp chhuaha khel Mizo tlangvalte an la au phur lo a, inkhel entute hi Mizo club ṭantute ai mahin I League inkhel thlirtute an ang zawk.

Chutihrualin a lan dan leh a tak ram a dang, a nihna takah chuan mipui hi Mizo club tan ticket man to pawisa loa player au phur châka pungkhawm an ni. Aizawl FC au hla 'dung dung chhits' tih ringawt hi chu minute 90 chhung atan chuan a ho lam deuh, Mizo club-in au hla thar an mamawh a, mipui kaihruai thei tur boruak siam thiam an mamawh bawk. Player-te'n match hnuhnung berah chak result an nei a, mipui lam tan vawiin hi insiamṭhat hun a ni. Sporting Goa nena duhthusama mipui thawm a awm lo a nih pawhin Northeast Derby (February 13) a Shillong Lajong hmachhawn hunah meuh chuan mipui thawm ṭha tak a awm tawh ang.

Mipuite hriat tel atana pawimawh chu Aizawl FC-in entu nei reng chungin ticket man 25% in an tihniam a, Mizo mipui tan nuai chuang hloh pawi an ti lo. Lawmthu sawi nana mipui tih theih hmasak ber chu KAWR SEN ha chunga inkhel en a ni.

Foreigner Vs Foreigner

I League-ah hian staring eleven-ah player pali a dah luh theih a, pali zinga pakhat chu Asian player an ni tur a ni. Aizawl FC-in foreigner pali Alfred Kemah Jaryan, Yuta Kinowaki, Emma Chigozie leh Atsushi Yonezawa te an kawl. Forward Alfred leh midfielder Yuta hi team tan player ṭangkai an ni a, Emma leh Atsushi te erawh starting eleven a tel chiang turin an ṭha tawk lo.

Sporting Goa tan erawh an foreigner pali forward Odafa Onyeka Okolie, defen-der Loveday Enyinnaya bakah midfielder pahnih Densill Theobald leh Mahmoud Amnah ten team-ah hmun pawimawh an chang. Trinidadian midfielder ṭha Theobald hi nikuma Royal Wahingdoh pathumna nih theihna chhan a ni a, DSK an hmachhawn ṭuma a tel theih loh hnuin Aizawl FC a hmachhawn thei dawn. MPL champion vanneihna erawh Syrian midfielder ṭha Mahmoud Amnah chu inhliam vangin Mizoramah a rawn zin lo. Mahmoud Amnah hi Al-Ittihad tana a khelh laiin Syrian Premier League leh Syrian Cup-ah a champion tawh a, result ti danglam thei tura thiamna leh tawnhriat nei ṭha a ni.

Odafa vs Mizo tlarhnung

Pre match conference-ah Spanish coach Manuel Retamero chuan, "Season tluanin player thlak kual duh mah ila tun ṭumah erawh inpuahchahna hun kan nei tlem em a, kan siksawi tam lo ang," tiin a sawi.

Aizawl FC boss hian DSK hma-chhawn tlarhnung a hman chuan keeper-ah Zothanmawia, defence laiah Lalramchullova leh Lalchhawnkima, wing back-ah Ricky Lallawmawma leh Lalruatthara te an awm dawn tihna a ni. Chhawnkima'n I League-ah tawnhriat a nei ṭha a, a bak pathum hi an khelh tawh chinah an khel ṭha em em bawk. Armed Veng tlangval Chullova leh Hmunhmeltha tlangval Ruatthara ten fak an hlawh zual a, Nigerian striker feet ruka sang Odafa hmaah fiahin an awm ang.

Mizo tlarhnung tichak tur hian Aizawl FC-in Yuta Kinowaki an kawl a, Japanese midfielder hian DSK an hneh
ṭumin goal a khung a, midfield-ah player ṭha bik a ni tih a lantir bawk.

Goal khungtu lam

Match thum khelh tawh aṭangin Alfred Kemah Jaryan chu Aizawl FC hma tawnga hlauhawm ber a ni a, a thlawptu MPL4 best player F. Lalrinpuia'n I League-ah hming a la chher lo. DSK an hneh ṭuma Hero of the Match-a thlan captain David Lalrinmuana erawh a tawnhriat neih ṭhat a lang ṭan a, palian lo mah se a thiam tlat avangin palian zingah a lang lian ṭhin hle. Winger pahnih Albert Zohmingmawia leh Brandon VL Remdika te an hmunawm ṭhin a, ball an keng rei hret ṭhin erawh team-in a ṭhat pui tam lo.

Coach a lawm

Aizawl FC coach Manuel Retamero chuan, "Supporter ṭha tak kan neih avangin ka lawm. Chet ṭhat loh ṭum ka nei a, chutichung chuan ṭawiawmna ṭha tak kan dawng a ni. Ticket hi mi nawlpui tan neih a harsa tih ka hria a, club pawhin mipui harsatna hriain discount an siam. Tunah chuan kan inkhel en turin mipui tam zawk an rawn kal ka beisei. Kan supporter, player leh keima tan point thum hmuh ka duh a ni," tiin chak ngei an tum thu a sawi.

Sporting Goa lam

Goan club Sporting Clube de Goa-in January 16-ah an mualah DSK an draw a, kar khat an chawlh hnuah Aizawl FC an hmachhawn dawn. Squad thlirin Sporting hi team ṭha zawk an ni a, foreigner bakah SAFF Cup-a India champion-na kawnga midfield khaipa Rowlin Borges an kawl a, Tamil defender Dharmaraj Ravanan leh keeper Arindam Bhattacharja te hi tawnhriat nei ṭha an ni.

Sporting Goa coach Mateus Costa chuan, "Chak tumin Aizawlah kan rawn kal. DSK kan draw ṭumin team ṭha zawk kan ni a, kan vanduai vang chauhin point thum kan hlawh lo. Aizawl FC leh DSK inkhel ka en hman lo a, Bagan nena an inkhelh ṭumah erawh team ṭha an ni tih ka hmu. Theihtawp kan chhuah dawn a, result eng pawh a thleng thei nachungin tun ṭum hi kan chak hmasak ber tur a nih ka ring," tiin a sawi. Sporting Goa boss hian Goa lamah artificial turf-a an khelh nasat avangin Rajiv Gandhi Stadium-a an talbuai a rin loh thu a sawi tel bawk.