Manchester khua a ngui
Upton Park-ah West Ham-in Enner Valencia hmangin ṭum hnih zet hma hruai mah se Manchester City-in Sergio Aguero hmangin an sut ve ve a, point khat an hlawh chhuak hram. City aiin an hmelma Manchester United an la mualpho zawk a, Old Trafford-a Southampton an hneh loh avangin United ṭantute'n an chhuak tur hi an boo hial!
Point khat a hlu
Kumin Premier League hi season dang ang a ni lo a, club liana sawi ṭhin tan pawh point thum hmuh chian sa a awm thei lo. City-in khualmuala point khat an hlawh chhuak hi result ṭha chu ni lo mah se result chhia a ni lo.
Chutihrualin tun season-ah City-in kualmualah result ṭha an nei lo a, table sang pathum zingah khualmuala an record a chhe ber. City hi away-ah vawi li chiah chak an la nei a, khualmual match hnuhnung pariatah point 24 hlawhchhuah theih mah se point sarih chiah an hmu - champion tum tan chuan an record hi a chhe hle.
Man City manager Manuel Pellegrini chuan, "Kan result-ah kan lungawi lo. Goal khung theihna tur vawi thum vel lai kan hlah a, kan goal hnih chhuahna kha a ho lam bawk," tiin point khat leka a lawm loh thu a sawi a, goal hnih khungtu Sergio Aguero erawh a fak thung.
Boo phu United
Manchester United-in match 23 khelhah point 37 an hmu a, Premier League ṭan hnua Red Devils point hmuh chhiat ber ṭum a ni. Louis van Gaal-a hote hian match 23 khelh zawha David Moyes-a hnuaia United point hmuh zat aiin point thumin an hmu tlem zawk.
Dutch manager hnuaia Uni-ted khelh danah club ṭantu tan lawmna tur a vang hle, Saints laka first half-a goal an khung loh chiah khan Old Trafford-a an match hnuhnung 11-a first half-a goal an khung lohna chiah a ni. United hian goal khung tur khelhin an khel lo a, ṭum dang ang bawkin ball an chang tam hle. Mikhual team Southampton goal hmaah an hlauhawm bik lo a, hun tawp hma minute thum chiah a awm tawh tihin substitute Charlie Austin-a'n club tana a vawi khat khelhnaah chakna goal a khung.
United boss Louis van Gaal chuan, "Inkhel kha ka thlir ve tho a, mipuiin min boo kha kan phu a ni. Kan ṭhat zelna tur a ni emaw kan chhiat belhchhahna tur emaw pawh nise tun dinhmuna kan mamawh ber chu ṭanrual a ni. Kan team hian result ṭha neih tumin theihtawp kan chhuah a, mah se inhliam kan ngah avangin result ṭha neih a harsa a ni," tiin a sawi.
Saints laka United chak loh ṭum hian Matteo Darmian chu inhliam vanga lakchhuah a ni a, damdawi in panpui nghal a ni. United hi player inhliam vangin an buai a, an record ṭha lo avangin pressure an ngah bawk.
United hi match tina goal 1.22 khung ang an ni a, Premier League ṭan hnua an record chhiat ber ṭum a ni. Chu chauh a ni lo, Van Gaal-a hnuaia an chak percentage hi 49.2% a ni a, David Moyes (50%) leh Ryan Giggs (50%) te hnuaia United result an pha lo a, Sir Alex Ferguson hnuaia United chak percentage 65.2% phei chu an tluk pha lo hle.