US Open-ah champion hlui Kuznetsova inlan dawn lo

US Open 2004 champion Svetlana Kuznetsova chu kumin hian New York khawpuiah a inlan dawn lo. Grand Slam tournament aṭanga a inhnuhdawh chhan hi coronavirus vang a nih thu a sawi.

August 31 aṭangin Flushing Meadows, New York-ah US Open hi khelh a ni dawn a, a hmunah entu an awm lo ang. Western & Southern Open chu a hmun pangngaiah hian August 22 aṭanga khelh tur a ni bawk.

Russian nula Kuznetsova chuan, "Hun rei tak chhung chu US Open khelh châk takin ka lo nghak tawh, mahse chu beiseina leh ruahmanna chu hripui leng hian a rawn thai chhe ta vek a ni," a ti.

A vanglai chuan Kuznetsova hi khawvel player ṭha berte zinga mi a ni a, US Open bakah hian French Open-ah pawh a champion tawh. Tunah erawh kum 35 mi a ni tawh a, world ranking-ah pawh 32-na a ni mek.

Hmeichhe singles huangah hian ranking sang pasarih zinga pathum chu an inhnukdawk tawh bawk. World number 1 Ashleigh Barty, number 5 Elina Svitolina leh number 7 Kiki Bertens te chuan an inlan loh tur thu an lo tichiang tawh a ni. Grand Slam vawi 23 champion tawh Serena Williams erawh inlan ngei a tum. American star hian nomawi a chawi thei a nih chuan Margaret Court (24 titles) nih rualin major title la hnem ber a ni ang.