Arsenal kawng daltu Chelsea

Arsenal-in Premier League hmahruaitu nih theihna hun ṭha an neih an chhawr ṭangkai thei lo. Pathianni zan khan champion lai Chelsea lakah si khat faiin an tlawm.

Emirates Stadium-a inkhel-ah ṭan aṭanga minute 18-na lekah Gunners defender Per Mertesacker chu hnawh chhuah a ni a, minute 23-naah Blues striker Diego Costa chuan he inkhela goal awmchhun chu a khung.

Tun season league match 23 khelh tawh aṭangin Arsenal hian point 44 an hmu tawhin Manchester City nen an intluk chiah. Hmahruaitu Leicester chu point thmunin an phak lo mek a ni. Blues pawhin point point 28 hmin table-ah 13-na dinhmun an rawn luah.

Inkhel chu

Mualneitu Arsenal lamin
ṭan aṭangin goal khung tumin an bei nghal a, mahse Chelsea tlarhnunga ding John Terry leh Kurt Zouma an nghing lo.

Chelsea lamin tlarhnung veng chungin counter attack aṭang-in Arsenal an bei let a, Spain international Costa ball tlan luhpui lo ti tlutu defender Mer--tesacker chu referee Mark Clattenburg-a'n a hnawt chhuak zui.

Manager Arsenae Wenger-a'n Olivier Giroud la chhuakin defender Gabriel Paulista a dah lut. Amaherawhcu, Brazil defender hian Costa goal khung tur a dan sak thei lo. Chelsea hian goal zawna an pet fuh an vanneih pui.

Second half-ah Arsenal hian an si phurh sut tumin na takin nawr mah se goal zawna an pet vawi ruk chu goal-ah a chang zo lo. Midfielder Mesut Ozil leh Alexis Sanchez te dam tawh mah se tlarhmaah a hmawr bawktu tur an awm lo tih a chiang. Goal an neih hmaa tlarhma lam ti pantu Wenger-a'n a ti sualah a ngaih theih.

Eng nge an sawi?

Arsenal manager Wenger chuan penalty chungchang sawiin, "Chelsea nen kan inhmachhawn hnuhnung vawi hnihah Costa hian kan player pahnih a hnawhchhuah tir a ni. Mertesacker khan a ti tlu ngei niin a lang a, mahse a khawih fuih lo tih chu in hmu vek. Anni nen league match a kan intawn hnuhnung pangaah kan player pali ngawt hnawh chhuah anni hi chu a awm lo hle. Inkhel pumpui thlir kha chuan point khat tal chu hmuh kan phu a ni," a ti.

Wenger chuan sawi chhun-zawmin, "Point thum kan hloh avangin kan lungngai a, amaherawhchu kan dinhmun hi chhe tak a la ni hran lo. Tun season chu title inchuha inelna hi match tawp ber thleng a nih a rinawm a, chuvangin tha kan thlah thiang lo, kan inkhelh lehpek turah rilru kan pek zui nghal a hun," tiin a sawi bawk.

Chelsea manager lailawk Hiddink chuan, "Costa leh Mertesacker chungchang kha ka la ennawn leh lo a, mimal thil anga ngaih tur ni pawhin ka hre lo. Refree Clattenburg khan a tih tur dik tak a ti niin ka ngai. Arsenal nena kan inkarah hian point la tam hle mah se Premier League-ah chuan result hi sawi lawk theih a ni lo a, chak zawk tur rinlawk ngawt theih a nih loh zia a ti lang chiang hlein ka hria," a ti.

Inkhel behbawm

* Arsenal hian Chelsea lakah league match-ah bik darkar kua leh minute 32 chhung goal an khung tawh lo.

* Chelsea hi Arsenal lakah a zawnin Premier League-ah match kaw chhung an tlawm tawh lo.

* Manager lailawk Guus Hiddink enkawlna hnuaiah striker Costa hian inelna hrang hrangah match ruk a khelh aṭangin goal ruk a khung tawh.

* Arsenal hian kum 2012 August thla hnua a vawi khat nan league-ah a zawnin goal an khung lo.

* Tun dinhmunah Blues hi league-ah hneh loh nei lo a kal tluang rei ber an ni mek, an khingpuite nen vawi li inhnehtawkin vawi thum chu hnehna an chang a ni.